టాలీవుడ్‌ యంగ్‌ హీరో విజయ్‌ దేవరకొండ నగరంలోని ప్రసాద్‌ ఐమ్యాక్స్‌లో సందడి చేశారు. ఆయన నిర్మాతగా వ్యవహరిస్తున్న ‘మీకు మాత్రమే చెప్తా’ సినిమా శుక్రవారం ప్రేక్షకుల ముందుకొచ్చింది. ఈ క్రమంలో విజయ్‌ దేవరకొండ ఈ ఉదయం ఐమ్యాక్స్‌కు చేరుకుని అక్కడి టిక్కెట్‌ కౌంటర్‌లో కూర్చుని వచ్చిన సినీప్రేక్షకులకు టిక్కెట్లును విక్రయించారు. దీంతో టిక్కెట్‌ కౌంటర్‌లో విజయ్‌ను చూసిన అభిమానులు ఆనందంతో కేరింతలు కొట్టారు. విజయ్‌ను చూడడం చాలా సంతోషంగా ఉందని పలువురు అభిమానులు తెలిపారు. పలువురు అభిమానులు విజయ్‌తో ఫొటోలు దిగారు.
‘పెళ్లి చూపులు’ సినిమాతో దర్శకుడిగా మంచి గుర్తింపు తెచ్చుకున్నారు తరుణ్‌భాస్కర్‌. తాజాగా ఆయన హీరోగా పరిచయమవుతున్న చిత్రం ‘మీకు మాత్రమే చెప్తా’ షమ్మీర్‌ సుల్తాన్‌ దర్శకత్వం వహించారు. ఈ సినిమాకి విజయ్‌ దేవరకొండ నిర్మాతగా వ్యవహరించారు. అనసూయ, అభినవ్‌ గౌతమ్‌ కీలకపాత్రలు పోషించారు. మరోవైపు ఇటీవల విడుదలైన ‘డియర్‌ కామ్రేడ్‌’ చిత్రంతో మిశ్రమ ఫలితాన్ని అందుకున్నారు నటుడు విజయ్‌ దేవరకొండ.
ప్రస్తుతం ఆయన ‘వరల్డ్‌ ఫేమస్‌ లవర్‌’ సినిమాలో నటిస్తున్నారు. అంతేకాకుండా పూరీజగన్నాథ్‌ దర్శకత్వం వహించనున్న ఓ సినిమాలో విజయ్‌ నటించనున్నారు. వచ్చే ఏడాది జనవరి నుంచి ఈ చిత్రం పట్టాలెక్కనుంది.
