Chiranjeevi Vishwambhara: తెలుగు సినిమా ఇండస్ట్రీలో ఎన్నో సంవత్సరాల నుంచి మెగాస్టార్ గా కొనసాగుతున్న హీరో చిరంజీవి. సీనియర్ ఎన్టీఆర్ తరువాత మళ్లీ తెలుగు సినిమా ఇండస్ట్రీలో అంతటి అభిమానాన్ని సొంతం చేసుకున్నాడు ఈ హీరో. అయితే రాజకీయాల్లోకి వెళ్లి మళ్లీ సినిమాల్లోకి రీ ఎంట్రీ ఇచ్చిన దగ్గర నుంచి చిరంజీవి టైం పెద్దగా బాగాలేదు.
రీమేక్ సినిమాలు చేస్తూ ప్రేక్షకుల దగ్గర ఎన్నో విమర్శలు అందుకుంటున్నారు. రీ-ఎంట్రీ ఇచ్చిన తరువాత చిరంజీవికి ఇప్పటివరకు ఒక్క బ్లాక్ బస్టర్ లేదు. బ్లాక్ బస్టర్ సంగతి దేవుడు ఎరుక…కనీసం సూపర్ హిట్ కూడా నిన్న మొన్నటి వరకు చిరంజీవికి రాలేదు. సినిమా టాక్ బాగున్నా కానీ.. ఈ మధ్య వచ్చిన ఎన్నో చిరంజీవి సినిమాలు బాక్స్ ఆఫీస్ దగ్గర మాత్రం పెద్దగా సత్తా చాతలేకపోయాయి. ఖైదీ నెంబర్ 150, సైరా లాంటి సినిమాలు ఆ లెక్క కిందకే వస్తాయి. ఇక చిరంజీవికి వాల్తేరు వీరయ్య రూపంలో ఆయన రీ-ఎంట్రి ఇచ్చిన తర్వాత ఒక్క విజయం నమోదయింది. కానీ ఈ చిత్రం కూడా కథపరంగా విమర్శలు అందుకుంది. చిరంజీవి స్థాయికి తగిన కథ కాదు అని ఎందరో కామెంట్స్ చేశారు.
ఈ క్రమంలో ఈసారి ఎలాగైనా తన రాబోయే చిత్రం విశ్వంభర ద్వారా.. బ్లాక్ బస్టర్ విజయం సాధించాలని గట్టిగా ఫిక్స్ అయ్యారు చిరంజీవి. అందుకే ఈ సినిమా విజయం కోసం ఎన్నో అష్ట కష్టాలు పడుతున్నారు.
విజువల్ వండర్‌గా తెరకెక్కుతోన్న ‘విశ్వంభర’ సినిమాను పాన్ ఇండియా రేంజ్‌లో తీస్తున్నారు. ఇక ఈ సినిమా కోసం చిరంజీవి కెరీర్ లో ఎప్పుడూ లేనంత బడ్జెట్ కూడా పెడుతున్నాడు. అంతేకాకుండా ఈ సినిమాలో ఎంతోమంది యువ హీరో, హీరోయిన్లను కూడా తెచ్చి పెడుతున్నారు. ఇప్పటికే చిరంజీవి చెల్లెలుగా నలుగురు పేరున్న హీరోయిన్స్ ని తీసుకున్నారని వార్తలు వస్తున్నాయి. ఇక ఒక సీనియర్ హీరోయిన్ కూడా ఈ సినిమాలో కనిపించనుందట. ఈ నేపథ్యంలో ఇప్పుడు ఈ చిత్రంలో మెగా కాంపౌండ్ హీరో కూడా కనిపించనున్నారు అని వార్తలు వస్తున్నాయి. వరస డిజాస్టర్స్ తో సతమతమవుతున్న వైష్ణవ తేజ్ .. ఈ సినిమాలో ఒక కీలక పాత్రలో కనిపించనున్నారట. ఇక త్వరలోనే ఈ మెగా కాంపౌండ్ హీరో షూట్‌లో పాల్గొనబోతున్నాడని అంటున్నారు.
మొత్తానికి ఒక బ్లాక్ బస్టర్ కోసం.. విశ్వంభర సినిమాలో ఎన్నో హంగులు పెడుతున్నారు. మరి ఈ చిత్రం అన్న మెగాస్టార్ రేంజ్ కి సరిపడా హిట్ ఇస్తుందేమో వేచి చూడాలి.
