నేచురల్ స్టార్ నాని, హీరో సుధీర్‌ బాబు కలిసి నటిస్తున్న తాజా చిత్రం ‘వి’. మోహన్‌ కృష్ణ ఇంద్రగంటి డైరెక్షన్‌లో వస్తున్న ఈ సినిమాలో సుధీర్‌ బాబు పోలీస్‌ ఆఫీసర్‌గా .. నాని విలన్‌ లక్షణలు కలిగిన పాత్రల్లో కనిపించనున్నారు. ఇప్పటికే విడుదలైన ఈ సినిమా ఫస్ట్‌లుక్‌ పోస్టర్లు సినిమాపై ఎంతో ఆసక్తిని పెంచిన నేపథ్యంలో నేడు తాజాగా ఈ సినిమా టీజర్‌ను సోషల్‌మీడియా వేదికగా చిత్రబృందం విడుదల చేసింది.
ఈ టీజర్‌లో సుధీర్‌, నానిల మధ్య చిత్రీకరించిన సన్నివేశాలు ప్రేక్షకులను ఆకట్టుకునేలా ఉన్నాయి. నివేదా థామస్‌, అదితిరావు హైదరీ హీరోయిన్‌లుగా నటించనున్నారు. శ్రీ వెంకటేశ్వర క్రియేషన్స్‌ బ్యానర్‌పై దిల్‌ రాజు ఈ చిత్రాన్ని నిర్మిస్తున్నారు. శరవేగంగా చిత్రీకరణ జరుపుకొంటున్న ఈసినిమా ఉగాది కానుకగా మార్చి 25వ తేదీన విడుదల కానుంది.
