Upcoming Telugu Movies in 2024: ఓటీటీల పుణ్యమా అని సగం ప్రేక్షకులు థియేటర్లకు వచ్చే సినిమాలో చూడటం మానేశారు. కేవలం స్టార్ హీరో సినిమాలకు మాత్రమే థియేటర్ల దాకా రావడానికి ప్రేక్షకులు ఆసక్తి చూపిస్తున్నారు. కానీ స్టార్ హీరో సినిమా అంటే విడుదలకి సంవత్సరాలు పడతాయని ప్రత్యేకంగా చెప్పాల్సిన అవసరం లేదు.
ప్రస్తుతం టాలీవుడ్ లో స్టార్ హీరోల వైఖరి అభిమానులను సైతం ఆందోళనకు గురిచేస్తోంది. మొదటగా పవర్ స్టార్ పవన్ కళ్యాణ్ హీరోగా సుజిత్ దర్శకత్వంలో తెరకెక్కుతున్న ఓజీ సినిమా సెప్టెంబర్ 27న విడుదలవుతుంది అని చిత్ర బృందం ప్రకటించింది. కానీ ఇప్పుడు ఎటువంటి అధికారిక ప్రకటన కూడా లేకుండా చాలా సైలెంట్ గా చిత్ర బృందం అనుకున్న తేదీ నుంచి సినిమాని సైడ్ చేసేసింది.
అదే రోజున ఎన్టీఆర్ దేవర సినిమా విడుదలవుతుంది అని ప్రకటన రావడంతో ఇక ఓజీ సినిమా ఆ డేట్ నుంచి తప్పుకున్నట్టే అని క్లారిటీ వచ్చేసింది. మరోవైపు భారీ అంచనాల మధ్య అల్లు అర్జున్ హీరోగా నటిస్తున్న పుష్ప 2 కూడా ఆగస్టు 15న విడుదల కావాల్సింది. కానీ ఓజీ సినిమా లాగానే ఈ సినిమాని కూడా చిత్ర బృందం చాలా సైలెంట్ గా ఆగస్టు బరిలో నుంచి తీసేసింది.
కనీసం తమ సినిమా పోస్ట్ పోన్ అవుతున్నప్పుడు నెక్స్ట్ రిలీజ్ డేట్ ఎప్పుడు అనే విషయం గురించి అయినా క్లారిటీ ఇస్తే బాగుంటుంది. కానీ స్టార్ హీరోలు కనీసం సినిమా వాయిదా పడుతుందన్న విషయాన్ని కూడా అధికారికంగా ప్రకటించడానికి ఆసక్తి చూపించడం లేదు.
మరోవైపు అభిమానులు మాత్రం తమ ఫేవరెట్ హీరో సినిమాల కోసం నెలల తరబడి ఎదురు చూస్తూనే ఉంటారు. అసలు స్టార్ హీరో సినిమా అంటే భారీ బడ్జెట్ తో ఎక్కుతుంది కాబట్టి సినిమా చిత్రీకరణకి కూడా కనీసం సంవత్సరం అయినా పడుతుంది. ప్రస్తుతం ఇండస్ట్రీలో ఉన్న స్టార్ హీరోలు అందరూ రెండు సంవత్సరాలకి ఒక సినిమా తీస్తున్న వారే. అసలే హీరోలు ఇంతింత గ్యాప్ తీసుకొని సినిమాలు చేస్తున్నారు అని ఫ్యాన్స్ ఫీల్ అవుతూ ఉండగా, మరోవైపు అనుకున్న తేదీకి విడుదల చేయకుండా సినిమాని మరింతగా వాయిదా వేస్తూ అభిమానులతో పడిగాపులు కాయిస్తున్నారు.
కనీసం షూటింగ్ గురించి అప్డేట్ ఇవ్వమని అడిగినా కూడా కొంతమంది స్టార్ హీరోలు ఫైర్ అయిపోతూ ఉంటారు. ఎంత సినిమాలు బ్లాక్ బస్టర్లు అవుతున్నప్పటికీ ఫ్యాన్స్ ఒక్కో సినిమా కోసం ఇంతకాలం ఎదురు చూడలేకపోతున్నారు. ఒకవేళ పొరపాటున ఏదైనా సినిమా ఫ్లాప్ అయినా కూడా మరొక సినిమా రావడానికి బోలెడు నెలలు గ్యాప్ వచ్చేస్తోంది. ఇది కూడా అభిమానులకి చిరాకు తెప్పిస్తోంది.
ఏదేమైనా స్టార్ హీరోలు తమ స్టార్ డం ని అడ్డం పెట్టుకొని అభిమానులను సంవత్సరాల తరబడి ఎదురుచూపుల్లోనే ఉంచేస్తున్నారు. ఇక ఇలాగే కొనసాగితే సినిమా విడుదలైన తరువాత కూడా సినిమా ఎలా ఉంది అనే విషయం పక్కన పెట్టి ఎట్టకేలకి సినిమా విడుదల అయితే అయింది కదా అని ఫ్యాన్స్ సంతోష పడాల్సిన సందర్భాలు వస్తాయేమో.
