పవర్ స్టార్ పవన్ కళ్యాణ్‌ తాను హీరోగా నటించిన కొన్ని సినిమాలలో పాటలు పాడిన సంగతి తెలిసిందే. తమ్ముడు, ఖుషి, గుడుంబా శంకర్, జానీ, అత్తారింటికి దారేది, ‘అజ్ఞాతవాసి వంటి సినిమాలలో సాంగ్స్ పాడి అభిమానులను అలరించాడు. ఈ క్రమంలో పవన్ మరోసారి తన గొంతు సవరించుకోడానికి రెడీ అవుతున్నట్లు తెలుస్తోంది. పవన్ ప్రస్తుతం ప్రస్తుతం వకీల్ సాబ్ సినిమాలో నటిస్తున్నాడు. వేణు శ్రీరామ్ దర్శకత్వంలో వస్తున్న ఈసినిమా ఇప్పటికే చిత్రీకరణ పూర్తి చేసుకుని నిర్మాణానంతర కార్యక్రమాలు జరుపుకొంటోంది. ఏప్రిల్ 9న ఈ చిత్రాన్ని ప్రపంచ వ్యాప్తంగా విడుదల కానుంది. ఈ నేపథ్యంలో మ్యూజిక్ డైరెక్టర్ థమన్ ప్రమోషన్స్ భాగంలో పవన్ తన నెక్స్ట్ మూవీలో ఓ పాట పాడబోతున్నట్లు వెల్లడించారు.
థమన్ ‘వకీల్ సాబ్’ తో పాటుగా ‘అయ్యప్పనుమ్ కొశీయుమ్’ తెలుగు రీమేక్ కి కూడా మ్యూజిక్ అందిస్తున్న సంగతి తెలిసిందే. సాగర్.కె.చంద్ర దర్శకత్వం వహిస్తున్న ఈ చిత్రానికి త్రివిక్రమ్ శ్రీనివాస్ స్క్రీన్ప్లే – డైలాగ్స్ అందిస్తున్నాడు. సితార ఎంటర్టైన్మెంట్స్ బ్యానర్ పై సూర్యదేవర నాగవంశీ ఈ సినిమాని నిర్మిస్తున్నాడు. ఈ చిత్రంలోనే పవన్ ఓ సాంగ్ ఆలపించబోతున్నట్లు థమన్ వెల్లడించారు.
