బెల్లంకొండ గణేశ్ హీరోగా ఎంట్రీ ఇస్తున్న చిత్రం ‘స్వాతిముత్యం’. లక్ష్మణ్ కె కృష్ణ డైరెక్షన్‌లో వస్తున్న ఈ సినిమాని సితార బ్యానర్ పై నాగవంశీ నిర్మిస్తున్నారు. వర్ష బొల్లమ్మ హీరోయిన్‌గా అలరించనున్న ఈ సినిమా విడుదలకు ముస్తాబై కొంతకాలమవుతోంది. అయితే సరైన టైమ్‌ కోసం ఎదురు చూస్తున్నారు.
ఈ మధ్య ఒక రిలీజ్ డేట్ కూడా ప్రకటించారు. కొన్ని కారణాలు వల్ల.. వాయిదా వేశారు. కొంతసేపటి క్రితం ఈ సినిమా విడుదల తేదీను ప్రకటించారు. ‘దసరా’ పండుగ సందర్భంగా ఈ సినిమాను అక్టోబర్ 5వ తేదీన విడుదల చేయనున్నారు. అందుకు సంబంధించిన పోస్టర్ ను కూడా విడుదల చేశారు.
లవ్ అండ్ ఫ్యామిలీ ఎంటర్టైనర్ జోనర్లో నిర్మితమైన ఈ సినిమాకి మహతి స్వరసాగర్ సంగీతాన్ని సమకూర్చాడు. ఇందులో సీనియర్ నటుడు నరేష్ వీకే, రావు రమేష్, సుబ్బరాజు, వెన్నెల కిషోర్, సునయన, దివ్య శ్రీపాద తదితరులు ఇతర పాత్రలు పోషించారు. బెల్లంకొండ ఫ్యామిలీ నుంచి వచ్చిన శ్రీనివాస్ మాస్ హీరోగా మంచి ఇమేజ్ ను తెచ్చుకున్నాడు. ‘ఛత్రపతి’ రీమేక్ తో శ్రీనివాస్ బాలీవుడ్ లో ఎంట్రీ ఇస్తుండగా.. ఆయన తమ్ముడు టాలీవుడ్ కి పరిచయమవుతుండటం విశేషం.
