సుమంత్ హీరోగా నటిస్తున్న తాజా చిత్రం ‘అహం రీబూట్’. వాయుపుత్ర ఎంటర్ టైన్ మెంట్స్, ఎస్ ఒరిజినల్స్ సంయుక్త నిర్మాణంలో రఘువీర్ గోరిపర్తి, సృజన్ యరబోలు నిర్మిస్తున్నారు. ప్రశాంత్ సాగర్ అట్లూరి డైరెక్షన్‌లో ‘అహం రీబూట్’ సినిమా షూటింగ్ హైదరాబాద్ అన్నపూర్ణ స్టూడియోలో లాంఛనంగా ప్రారంభమైంది. ఈ కార్యక్రమానికి అతిథులుగా హాజరైన దర్శకులు చందు మొండేటి కెమెరా స్విచ్ఛాన్ చేయగా, శరణ్ కొప్పిశెట్టి క్లాప్ కొట్టారు.
ఈ సినిమాలో హీరో సుమంత్ ఆర్జేగా నటిస్తుండటం విశేషం. ఈ మూవీ ప్రేక్షకులకు కొత్త అనుభూతిని ఇచ్చేలా ఉంటుందని దర్శకుడు ప్రశాంత్ సాగర్ చెబుతున్నారు. ‘అహం అంటే నేను. అహం రీబూట్ అంటే సెల్ఫ్ రీబూట్. ఈగో, పొగరు, ద్వేషం లాంటి అర్థాలు కాకుండా అహం అంటే నేను అనే విషయాన్ని తెలిపే ప్రయత్నం చేస్తున్నాం అన్నారు దర్శకుడు ప్రశాంత్ సాగర్. సినిమా ప్రారంభోత్సవం సందర్భంగా కాన్సెప్ట్ పోస్టర్ ను రిలీజ్ చేశారు. శ్రీరామ్ మద్దూరి సంగీతం అందిస్తున్నారు.
