SS Rajamouli Son Movies:
ఎస్ఎస్ రాజమౌళి తనయుడు ఎస్ ఎస్ కార్తికేయ కూడా తన తండ్రితో పాటే సినిమాల మధ్యలోనే పెరిగాడు. చిన్నప్పటి నుంచే సినిమాల మీద ఆసక్తి ఉన్న కార్తికేయ నిర్మాతగా పలు సినిమాలకు వ్యవహరించాడు. రాజమౌళి సినిమాలకి లైన్ ప్రొడ్యూసర్ గా కూడా పనిచేశాడు. కానీ కార్తికేయ డైరెక్టర్ గా కూడా ఒక షార్ట్ ఫిలిం తీసిన విషయం మీకు తెలుసా?
కార్తికేయ దర్శకత్వంలో అక్కినేని అఖిల్ హీరోగా.. నిహారిక కొణిదెల హీరోయిన్ గా ఒక షార్ట్ ఫిలిం పూర్తి అయింది. ఇది జరిగి చాలా కాలం అయింది.. కానీ షార్ట్ ఫిలిం మాత్రం విడుదల కాలేదు. దీనికి కారణం రాజమౌళి అని తెలుస్తోంది. ఈ విషయం స్వయంగా నిహారిక బయటపెట్టింది.
ఈ మధ్యనే ఒక పాడ్ క్యాస్ట్ కి వచ్చిన నిహారిక కొన్ని ఆసక్తికరమైన విషయాలను బయటపెట్టింది. ఈ నేపథ్యంలో మాట్లాడుతూ షార్ట్ ఫిలిం విషయం గురించి చెప్పింది. “అఖిల్ తో ఒక పెద్ద షార్ట్ ఫిలిం చేశాను. దానికి కార్తికేయ ఎస్ ఎస్ డైరెక్టర్. రాజమౌళి సార్, నాగార్జున సార్, నాగబాబు ఇలాంటి పెద్ద పేర్లతో ప్రాజెక్ట్ అని అనుకున్నాము. అది బాగానే వచ్చింది కానీ.. షార్ట్ ఫిలిం మొత్తం చూశాక ఇవి రిలీజ్ చేయకపోతే బెటర్ అని రాజమౌళి సార్ అన్నారు” అని నవ్వేసింది నిహారిక.
షార్ట్ ఫిలిం సరిగ్గా రాలేదని.. విడుదల చేయొద్దు అని రాజమౌళి చెప్పడంతో.. ఈ క్రేజీ కాంబినేషన్లో వచ్చిన షార్ట్ ఫిలిం ఇప్పటికీ వెలుగు చూడలేదు. అఖిల్ తో మాత్రమే కాకుండా హీరో విశ్వక్ సేన్ తో కూడా నిహారిక ఒక షార్ట్ ఫిలిం చేయాల్సిందట. ముందు అది షార్ట్ ఫిలిం గానే తీయాలి అనుకున్నప్పటికీ.. కేవలం ఒక పాట మాత్రమే చేయగలిగాము అని చెప్పింది నిహారిక. ఇక కాలేజీలో చదువుకున్న రోజుల్లోనే నిహారిక విశ్వక్ సేన్ కి సీనియర్ అని పలు సందర్భాల్లో ఇద్దరూ బయటపెట్టిన సంగతి తెలిసిందే.
మరోవైపు షార్ట్ ఫిలిం బాగా రాకపోయినా కూడా.. రిలీజ్ అయ్యుంటే బాగుండేది అని.. ఇప్పటికైనా రిలీజ్ చేస్తే బాగుంటుంది అని ఫాన్స్ కామెంట్స్ చేస్తున్నారు.
