కోలీవుడ్‌ నటుడు శివ కార్తికేయన్‌ హీరోగా నటించిన సైన్స్‌ ఫిక్షన్‌ మూవీ ‘అయలాన్‌’. ఏలియన్స్‌ నేపథ్యంలో సాగే విభిన్నమైన కథాంశంతో ఈ సినిమా తెరకెక్కింది. ఆర్‌.రవికుమార్‌ దర్శకత్వం వహించిన ఈ సినిమాలో రకుల్‌ ప్రీత్‌ సింగ్‌ హీరోయిన్‌గా నటించింది.
ఈ సినిమాలో శివకార్తికేయన్, రకుల్‌తో పాటు ఇషా కొప్పికర్, శరద్‌ కేల్కర్‌, భానుప్రియ, యోగి బాబు, కరుణాకరన్‌, బాల శరవణన్ త‌దిత‌రులు కీలక పాత్రలు పోషిస్తున్నారు.
జనవరి 12న సంక్రాంతి సందర్భంగా ఈ సినిమా ప్రేక్షకుల ముందుకు రానుంది. ఇందులో భాగంగా శివ కార్తికేయన్‌ తాజాగా ఓ ఇంటర్వ్యూలో పాల్గొన్నారు. తన సినీ కెరీర్‌ పట్ల ఆనందం వ్యక్తం చేశారు. అన్ని వర్గాల ప్రేక్షకులను అలరించే చిత్రాల్లో నటించడం ఎంతో సంతోషంగా ఉందన్నారు.
”సినిమా ఫలితంతో సంబంధం లేకుండా.. ఇప్పటివరకూ నేను నటించిన అన్ని చిత్రాల విషయంలో సంతోషంగా ఉన్నా. చిన్నాపెద్దా అనే తేడా లేకుండా ప్రతి ఒక్కరూ చూసే కథలను మాత్రమే ఎంచుకుంటున్నా. ‘ఏ’ సర్టిఫికేట్‌ చిత్రాల్లో నటించాలనుకోవడం లేదు.
ఎందుకంటే, అందరికీ వినోదాన్ని అందించే చిత్రాల్లో నటించడమే నాకు ఇష్టం. ఇటీవల నేను నటించిన ‘ప్రిన్స్‌’ బాక్సాఫీస్‌ వద్ద పరాజయాన్ని అందుకుంది. నా వరకూ ఆ చిత్రానికి మైనస్‌ నేనే. అదే కథను నూతన హీరోతో తెరకెక్కించి ఉంటే తప్పకుండా విజయం అందుకునేది” అని ఆయన తెలిపారు.
