తెలుగులో ఇష్టం సినిమాతో ఇండస్ట్రీలోకి ఎంట్రీ ఇచ్చింది శ్రియా శరణ్. తన అందం, అభినయంతో దాదాపు 20 ఏళ్ల పాటు ప్రేక్షకులను అలరించింది. వివాహం తర్వాత సినిమాలకు దూరంగా ఉన్న శ్రియ మళ్లీ సెకండ్ ఇన్నింగ్స్ మొదలు పెట్టింది. తాజాగా శ్రియ ప్రధాన పాత్రలో తెరకెక్కుతున్న చిత్రం గమనం. ఈ చిత్రం తెలుగు, తమిళం, మలయాళం, కన్నడ, హిందీలో తెరకెక్కుతోంది. శ్రియ పుట్టినరోజు సందర్భంగా ఈ చిత్రానికి సంబంధించి ఫస్ట్‌లుక్‌ను దర్శకుడు క్రిష్ చేతుల మీదుగా విడుదల చేశారు. ఇందులో శ్రియ ఓ సాధారణ గృహిణిలా కనిపిస్తోంది. శ్రియ ఈ సినిమాలో ఓ వైవిధ్యమైన పాత్రలో కనిపించబోతుంది. ఈ చిత్రానికి కథ, స్ర్కీన్‌ప్లే, దర్శకత్వం సుజనా రావు. ఇళయ రాజా సంగీతం అందిస్తున్న ఈ చిత్రానికి రమేష్ కరుటూరి నిర్మాత. ఇప్పటికే షూటింగ్ పూర్తిచేసుకున్న ఈ సినిమా ప్రస్తుతం పోస్ట్ ప్రొడక్షన్ పనులతో బిజీగా ఉంది. ఇందులో శ్రియతో పాటు శివ కందుకూరి, నిత్యామీనన్‌, ప్రియాంక జువాల్కర్‌ ఇతర పాత్రలు పోషిస్తున్నారు.
