టాలీవుడ్‌ హీరో స్టైలిష్ స్టార్‌ అల్లు అర్జున్‌ నటిస్తున్న తాజా చిత్రం ‘పుష్ప’. ప్యాన్ ఇండియా సినిమాగా రూపొందుతోన్న ఈ సినిమాకి సుకుమార్‌ దర్శకత్వం వహిస్తున్నాడు. మూవీలో ఓ క్యారెక్టర్‌కి భారీ మొత్తంలో పారితోషికం ఇవ్వనున్నట్లు సమాచారం. జాతీయ అవార్డు గ్రహీత, మలయాళీ స్టార్‌ హీరో ఫాహద్‌ ఫాజిల్‌ ‘పుష్ప’లో విలన్‌గా నటిస్తున్న సంగతి తెలిసిందే. ఇందుకు గాను ఫాజిల్‌కు ఏకంగా ఐదు కోట్ల రూపాయలు(జీఎస్‌టీ అదనం) పారితోషికంగా ఇవ్వనున్నట్లు తెలుస్తోంది. మన దగ్గర చిన్న హీరోలు సైతం ఈ రేంజ్‌లో పారితోషికం డిమాండ్‌ చేయడం లేదు. అలాంటిది విలన్‌ పాత్ర చేసే ఫాజిల్‌కు ఇన్ని కోట్లు ఇవ్వడం టూమచ్‌ అని కొందరు అంటుండగా.. మరి కొందరు మాత్రం అతడి రేంజ్‌కు ఇది తక్కువే అని అంటున్నారు. గతంలో ఫాజిల్‌ పలు అవార్డులు దక్కించుకున్నాడు. మళయాలంలో అతడికి ఎంతో క్రేజ్‌. వీటన్నింటిని దృష్టిలో పెట్టుకునే పుష్ప మేకర్స్‌ ఇంత భారీ పారితోషికం ఇవ్వడానికి అంగీకరించారని సమాచారం. రష్మికా మందన్న హీరోయిన్‌గా నటిస్తున్న ఈ సినిమాని మైత్రీ మూవీ మేకర్స్‌పై నవీన్‌ ఎర్నేని, రవి శంకర్‌.వై నిర్మిస్తున్నారు. తెలుగు, తమిళ, మలయాళ, కన్నడ, హిందీ భాషల్లో ఆగస్టు 13న విడుదల చేయనున్నారు.
