టాలీవుడ్‌ సీనియర్‌ నటుడు శివాజీ రాజా కుమారుడు విజయ్‌ రాజా హీరోగా నటిస్తున్న సినిమా ‘వేయి శుభములు కలుగు నీకు’. రామ్స్‌ రాథోడ్‌ తెరకెక్కిస్తున్న ఈ సినిమాని తూము నరసింహా పటేల్‌, జామి శ్రీనివాసరావు సంయుక్తంగా నిర్మిస్తున్నారు. తమన్నా వ్యాస్‌ హీరోయిన్‌గా నటిస్తుంది. ఈ సినిమాలోని రెండో గీతాన్ని శివాజీ రాజా ఇటీవల విడుదల చేశారు. ఈ సందర్భంగా ఆయన మాట్లాడుతూ.. ‘‘టైటిల్‌ చాలా పాజిటివ్‌గా ఉంది. నేను ఇందులో ఓ మంచి పాత్ర చేశా. ఐటెం పాటలో ఫాల్గుణి, విజయ్‌ అద్భుతంగా నర్తించార’’న్నారు. ‘‘నిర్మాతలు ఎంతో కష్టపడి, ఖర్చుపెట్టి సినిమా తీశారు. గ్యానీ మంచి స్వరాలిచ్చారు’’ అన్నారు విజయ్‌ రాజా. డైరెక్టర్‌ మాట్లాడుతూ.. ‘‘మా సినిమా తొలి పాటకు ప్రేక్షకుల నుంచి మంచి ఆదరణ వచ్చింది. ఇప్పుడు విడుదలైన ‘‘కత్తి ఖతర్నాక్‌’’ గీతానికీ చక్కటి స్పందన వస్తోంద’’న్నారు.
అయితే ఈ వేడుకలో హాజరై శివాజీ రాజా అందరికి షాకిచ్చారు. సన్నగా పీలగా.. వయసు మరింత మీద పడినట్లుగా.. కాసింత బలహీనంగా కనిపించారు. ఆయన లుక్‌ చూసిన వారంతా.. అదేంటి శివాజీరాజా అలా అయిపోయారు? ఆయనకేమైంది? అని ఆశ్చర్యపోతున్నారు. శివాజీరాజా కొడుకు సినిమా నుండి.. తాజాగా విడుదల చేసిన పాట గురించి కంటే కూడా.. శివాజీరాజా హెల్త్ మీద.. ఆయన రూపమే హాట్‌ టాపిక్‌గా మారింది
