టాలీవుడ్‌ యంగ్‌ హీరో కిరణ్ అబ్బవరం వరుస సినిమాలతో బిజీగా ఉన్నాడు. వాటిలో ఓ మూడు సినిమాలు ఈ ఏడాదిలో ప్రేక్షకుల ముందుకు రానున్నాయి. ఆయన తాజా చిత్రంగా ‘సెబాస్టియన్ PC 524’ సినిమా ప్రేక్షకుల ముందుకు రానుంది. తాజాగా ఈ సినిమా నుంచి టీజర్ ను వదిలారు. మదనపల్లిలోని ఒక పోలీస్ స్టేషన్ కి కానిస్టేబుల్ గా ‘సెబాస్టియన్’ వస్తాడు. అదే అతని మొదటి పోస్టింగ్. అయితే అతనికి రేచీకటి ఉంటుంది. ఆ విషయం ఎవరికీ తెలియనీయవద్దని తల్లి చెప్పిన మాటలు ఆయనలో బలంగా నాటుకుంటాయి.
పోలీస్ స్టేషన్ లో రాత్రివేళలో డ్యూటీ పడినప్పుడు ఏం జరుగుతుంది? దాని పర్యవసానాలు ఎలాంటివి? అనేదే కథ. గిబ్రాన్ ఈ సినిమాకి సంగీతాన్ని అందించాడు. కిరణ్ అబ్బవరం జోడీగా నువేక్ష .. కోమలి ప్రసాద్ తెలుగు తెరకి హీరోయిన్‌లుగా పరిచయమవుతున్నారు. ఈ నెల 25వ తేదీన ఈ సినిమాను ప్రేక్షకుల ముందుకు తీసుకొస్తున్నారు.
