‘పలాస 1978’ ఫేం రక్షిత్ అట్లూరి .. కోమలీ హీరో హీరోయిన్లుగా నటిస్తోన్న తాజా చిత్రం ‘శశివదనే’. ఎస్.వి.ఎస్.స్టూడియోస్ బ్యానర్స్‌పై అహితేజ బెల్లంకొండ, అభిలాష్ రెడ్డి గోడల దీనిని నిర్మించారు. గోదావరి నేపథ్యంలో లవ్ అండ్ యాక్షన్ డ్రామాగా తెరకెక్కుతోన్న ఈ సినిమాకు, సాయి మోహన్ ఉబ్బర దర్శకత్వం వహించాడు.
షూటింగ్‌ పూర్తి చేసుకున్న ఈ చిత్రం ప్రస్తుతం పోస్ట్ ప్రొడక్షన్ కార్యక్రమాలను పూర్తి చేసుకుంటోంది. తాజాగా ఈ సినిమా టీజర్‌ను విడుదల చేశారు. టీజర్‌ను గమనిస్తే ఇది విలేజ్ బ్యాక్‌డ్రాప్‌లో సాగే అహ్లాదకరమైన ప్రేమకథ అని తెలుస్తోంది. హీరో – హీరోయిన్ మధ్య ఉన్న ప్రేమ సన్నివేశాలు హృదయాన్ని హత్తుకుంటున్నాయి.
ఇక టీజర్ ఎండింగ్‌లో హీరో రక్షిత్ లుక్ చూస్తుంటే కథలో ఎవరూ ఊహించని ట్విస్ట్ ఉండబోతుందని తెలుస్తుంది. ఇప్పటి వరకూ ఈ సినిమా నుండి విడుదలైన అప్డేట్స్‌కు మంచి స్పందన వచ్చింది. ఇక ఇప్పుడు విడుదలైన టీజర్ ఈ అంచనాలను రెట్టింపు చేస్తుంది. ఈ సినిమా త్వరలో విడుదల కానుంది.
