సూపర్ స్టార్‌ మహేశ్‌ బాబు నటిస్తున్న తాజా చిత్రం ‘సర్కారు వారి పాట’. పరశురామ్ డైరెక్షన్‌లో వస్తున్న ఈ సినిమాలో.. ‘మహానటి’ కీర్తి సురేష్‌ హీరోయిన్‌గా నటిస్తుంది. కాగా ఈ మూవీ షూటింగ్‌ను పూర్తి చేసుకుని నిన్న(శుక్రవారం, ఏప్రిల్‌ 22న) గుమ్మడికాయ కొట్టేసిన సంగతి తెలిసిందే. ఇక సినిమా ప్రమోషన్‌ కార్యక్రమాలతో పాటు పోస్ట్‌ ప్రొడక్షన్‌ పనులను స్టార్ట్‌ చేసిన చిత్ర బృందం తాజాగా ఈ మూవీ టైటిల్ సాంగ్‌ను విడుదల చేసి మహేశ్‌ అభిమానులకు ట్రీట్‌ ఇచ్చింది.
‘సరా సరా సర్కారు వారి పాట… షురూ షురూ అన్నాడురా అల్లూరి వారి బేటా…’ అంటూ సాగే ఈ పాట బాగా ఆకట్టుకుంటుంది. తమన్ సంగీతం అందించిన ఈ సాంగ్ ఈ రోజు(ఏప్రిల్‌ 23) ఉదయం 11 గంటలకు విడుదలై అప్పుడే యూట్యూబ్‌లో ట్రెండింగ్‌గా మారింది. కాగా ఇప్పటికే ఈ మూవీ నుంచి విడుదలైన కళావతి, పెన్నీ సాంగ్స్ సూపర్ హిట్‌గా నిలిచిన సంగతి తెలిసిందే. ఈ సినిమాలో సముద్రఖని, వెన్నెల కిశోర్ తదితరులు ముఖ్య పాత్రల్లో కనిపించనున్నారు. మైత్రీ మూవీ మేకర్స్ నిర్మిస్తున్న ఈ సినిమా మే 12న విడుదల కానుంది.
