టాలీవుడ్‌ స్టార్‌ హీరోయిన్‌ సమంత ప్రధాన పాత్రలో నటిస్తున్న చిత్రం ‘యశోద’. టైటిల్ ను ప్రకటించిన దగ్గర నుంచే ఈ మూవీపై ఆసక్తి మొదలైంది. శివలెంక కృష్ణ ప్రసాద్ నిర్మించిన ఈ సినిమాకి హరి – హరీశ్ దర్శకత్వం వహించారు. మణిశర్మ సంగీతం అందించి ఈ సినిమా, తాజాగా షూటింగు పార్టును పూర్తిచేసుకుంది. ఈ విషయాన్ని అధికారికంగా ప్రకటిస్తూ కొంతసేపటి క్రితం సమంత పోస్టర్ ను విడుదల చేశారు. విభిన్నమైన కథాకథనాలతో రూపొందిన ఈ సినిమాలో, వరలక్ష్మి శరత్ కుమార్ .. ఉన్ని ముకుందన్ .. రావు రమేశ్ .. మురళీ శర్మ ముఖ్యమైన పాత్రలను పోషించారు. వరలక్ష్మి శరత్ కుమార్ పాత్ర ఈ సినిమాకి హైలైట్ గా నిలుస్తుందని అంటున్నారు.
తెలుగుతో పాటు తమిళ .. మలయాళ .. కన్నడ .. హిందీ భాషల్లో ఈ సినిమాను విడుదల చేయనున్నారు. విడుదల తేదీను త్వరలోనే ప్రకటన చేయనున్నారు. ‘యూ టర్న్’ .. ‘ఓ బేబీ’ వంటి హిట్స్ తరువాత సమంత చేసిన సినిమా ఇది. ఇక గుణశేఖర్ దర్శకత్వంలో సమంత చేసిన ‘శాకుంతలం’ సినిమా కూడా విడుదలకు ముస్తాబవుతున్న సంగతి తెలిసిందే.
