హీరోయిన్‌ సమంత ‘ప్రత్యూష సపోర్ట్‌’ ద్వారా ఎందరో చిన్నారులకు అండగా నిలుస్తున్న సంగతి తెలిసిందే. అయితే ఈ సంస్థను స్థాపించిన తొలిరోజుల్లో ఓ పసికందుకి సమంత కాలేయానికి శస్త్రచికిత్స చేయించారు. ఇందుకోసం సమంత, తన బృందంతో కలిసి రూ.15 లక్షలు సేకరించారు. కానీ దురదృష్టవశాత్తు ఆ పసికందు చికిత్సకు స్పందించక చనిపోయింది. ఈ విషయం తెలిసి సమంత సెట్స్‌లోనే కన్నీరుమున్నీరయ్యారట.
ఈ విషయాన్ని సంస్థలో వలంటీర్‌గా పనిచేస్తున్న శశాంకా బినేష్‌ అనే యువతి ఇన్‌స్టాగ్రామ్‌ ద్వారా వెల్లడించారు. ‘ప్రత్యూష సపోర్ట్‌ ద్వారా హ్యాండిల్‌ చేసిన తొలి కేసు ఇప్పటికీ గుర్తుంది. సనా అనే పసికందుకు కాలేయ మార్పిడి చేయించాం. ఇందుకోసం రూ.15 లక్షలు సేకరించాం. పాపకు శస్త్రచికిత్స చేయించడానికి తల్లిదండ్రులకు స్థోమత లేదు. వారిది ప్రేమ వివాహం కావడంతో ఇంట్లో వారు కూడా పట్టించుకోలేదు. సనాకు శస్త్రచికిత్స చేయించినప్పటికీ దురదృష్టవశాత్తు పాప చనిపోయింది. ఈ ఘటన జరిగినప్పుడు సమంత ‘రభస’ సినిమా సెట్‌లో చిత్రీకరణలో ఉన్నారు. ఈ విషయాన్ని నేను సమంతకు ఫోన్‌ చేసి చెప్పాను. అది విని సమంత చాలా బాధపడ్డారు. సెట్‌లోనే కన్నీరుమున్నీరయ్యారు. మరో విషయం ఏంటంటే..సనా చనిపోయిన రోజే సమంత పుట్టినరోజు. మాకు ఇప్పటికీ సనా చాలా ప్రత్యేకం. ఇప్పటివరకు ప్రత్యూష సపోర్ట్‌ ద్వారా 547 మంది చిన్నారులను కాపాడగలిగాం.
ఈ సంస్థ కోసం మేం విరాళాలు సేకరిస్తున్నామని చెప్పుకోవడానికి ఎంతో గర్విస్తున్నాం. ఆ విరాళాల్లో భారీ మొత్తం సమంత నుంచే వస్తోంది. ఆమె ప్రోత్సాహం, మద్దతు వల్లే మేం ప్రత్యూష సంస్థను ముందుకు నడిపిస్తున్నాం. మంచిపని కోసం సాయం చేయడానికి సమంత ఎప్పుడూ ముందుంటారు. కాకపోతే ఇప్పుడు వస్తున్న కేసులను మేం జాగ్రత్తగా ఎంపికచేసుకుంటున్నాం. ఈరోజుల్లో హైరిస్క్‌ క్యాన్సర్‌లు, ట్రాన్స్‌ప్లాంటేషన్స్‌ ఎక్కువగా ఉన్నాయి. దాంతో మా వద్దకు వచ్చే కేసులను మా సహ వ్యవస్థాపకురాలు మంజులా అనగాని బాగా పరిశీలించాకే మేం ఓకే చేస్తున్నాం. దాంతో ఒక్కోసారి కొందరు పిల్లల కేసులను ఒప్పుకోలేని పరిస్థితి ఎదురవుతోంది. కాబట్టి మాకు వచ్చే విరాళాలను జాగ్రత్తగా ఉపయోగించాలనుకుంటున్నాం. నేను ప్రత్యూషకు రాకముందు కొన్ని ఎన్జీవోలతో కలిసి పనిచేశాను. వారు సాయం పేరుతో సొమ్ముచేసుకునేవారు. అది చూసి షాకయ్యాను. ఇప్పుడు నేను మా కుటుంబం నడుపుతున్న ‘హ్యాపీ హోమ్స్‌’ అనాథాశ్రమానికి కూడా విరాళాలు సేకరిస్తున్నాను.’ అని వెల్లడించారు. ఈ పోస్ట్‌పై సమంత స్పందిస్తూ..’నిన్ను చూస్తే చాలా గర్వంగా ఉంది’ అంటూ శశాంకా పెట్టిన పోస్ట్‌ను తన ఇన్‌స్టాగ్రామ్‌లో రీపోస్ట్‌ చేశారు.
హీరోయిన్‌ సమంత ‘ప్రత్యూష సపోర్ట్‌’ ద్వారా ఎందరో చిన్నారులకు అండగా నిలుస్తున్న సంగతి తెలిసిందే. అయితే ఈ సంస్థను స్థాపించిన తొలిరోజుల్లో ఓ పసికందుకి సమంత కాలేయానికి శస్త్రచికిత్స చేయించారు. ఇందుకోసం సమంత, తన బృందంతో కలిసి రూ.15 లక్షలు సేకరించారు. కానీ దురదృష్టవశాత్తు ఆ పసికందు చికిత్సకు స్పందించక చనిపోయింది. ఈ విషయం తెలిసి సమంత సెట్స్‌లోనే కన్నీరుమున్నీరయ్యారట.
