స్టార్ హీరోయిన్‌ సమంత అభిమానులు తరచూ అడుగుతున్న ఓ ప్రశ్నకు విసుగు చెందారు. ఇప్పటికే అనేక సందర్భాల్లో సామ్‌ తల్లి కాబోతున్నారని వార్తలు రాశారు. ట్విటర్‌లోనూ ఫాలోవర్స్‌ ఆమెను తల్లి కావడం గురించి ప్రశ్నించారు. ఆ సమయంలో కూల్‌గా సమాధానం చెప్పిన ఆమె తాజాగా అసహనానికి గురయ్యారు. తమిళ హిట్ ’96’ తెలుగు రీమేక్ షూటింగ్‌ను ఇటీవల పూర్తి చేసుకున్న సమంత ప్రస్తుతం ఓ సినిమాలో నటిస్తున్నారు. దీని షూటింగ్‌ కోసం పుణె వెళ్లిన ఆమె విమానంలో తిరిగి బయలుదేరారు. కానీ కొన్ని కారణాల వల్ల విమానం ఆలస్యమైంది. ఈ విరామంలో కాసేపు సరదాగా ఫాలోవర్స్‌తో మాట్లాడాలని సామ్‌ అనుకున్నారు. ఇన్‌స్టాగ్రామ్‌లో నెటిజన్లు అడిగిన పలు ప్రశ్నలకు జవాబులు ఇచ్చారు.
* మీరు నటి ఎలా అయ్యారు? అని ప్రశ్నించగా.. ‘నటనపై దృష్టి పెట్టడం వల్ల అయ్యానేమో (నవ్వుతూ)’ అని సామ్‌ అన్నారు.
* మీ తర్వాతి సినిమా ఏంటి? అని అడగగా.. ‘నేను చాలా ఆసక్తికరమైన ప్రాజెక్టులో నటిస్తున్నా. కచ్చితంగా మీకు కూడా అది నచ్చుతుంది. నేను ప్రామిస్‌ చేస్తున్నా’ అని చెప్పారు.
అనంతరం ‘మీ బాబు ఎప్పుడు వస్తాడు?’ అని ఓ ఫాలోవర్ ప్రశ్నించారు. అంతవరకు నవ్వుతూ ఉన్న సామ్‌ ఈ ప్రశ్నతో కోపం తెచ్చుకున్నారు. ‘నేను తల్లి కావాలని ఎదురుచూస్తున్న వారికి ఇదే నా సమాధానం. 2020 ఆగస్టు 7న ఉదయం 7 గంటలకు నా బేబీ జన్మించబోతోంది’ అని సీరియస్‌గా అన్నారు. విసుగు చెందిన నటి అలా మాట్లాడినట్లు అర్థం అవుతోంది. ఈ మధ్య కాలంలో నెటిజన్లు కాస్త అత్యుత్సాహం ప్రదర్శిస్తున్నారు. సెలబ్రిటీల వ్యక్తిగత జీవితం గురించి ప్రశ్నిస్తూ పోస్ట్‌లు చేస్తున్నారు. బాలీవుడ్‌ నటీమణులు దీపికా పదుకొణె, ప్రియాంకా చోప్రా విషయంలోనూ ఇలానే జరుగుతోంది.
