Sai Dharam Tej: హీరో సాయి ధరమ్‌ తేజ్ మరోసారి తన పేరు మార్చుకున్నాడు. మహిళా దినోత్సవం సందర్భంగా నిర్వహించిన ‘సత్య’ ప్రెస్ మీట్‌ వేదికగా ఈ సంగతి చెప్పారు. తన తల్లి ఎప్పుడూ తనతోనే ఉన్నట్లు ఉంటుందనే ఉద్దేశంతో ఆమె పేరు ‘దుర్గ’ని తీసుకుని సాయి దుర్గ తేజ్‌గా మార్చుకుంటున్నట్లు తెలిపారు.
గతంలో సాయి ధరమ్‌ తేజ్ తన పేరుని ‘సాయి తేజ్’గా మార్చుకున్నారు. కానీ ఇప్పటికీ చాలా మంది అతని అసలు పేరుతోనే పిలుస్తుంటారు. ఇక సత్య ప్రెస్ మీట్‌లో పలు ప్రశ్నలకి ఆసక్తికర సమాదాలు ఇచ్చాడు సాయి తేజ్. తన కొత్త సినిమా ‘గాంజా శంకర్’ ఆగిపోయిందా అని ఓ రిపోర్టర్ అడిగిన ప్రశ్నకి వెటకారంగా బదులిచ్చారు. “ఓ వెబ్‌సైట్‌లో ఆ సినిమా నిలిచిపోయిందనే ఆర్టికల్‌ చదివాను.. ఆ తర్వాత అప్‌డేట్‌ గురించి నాకు తెలియదు. ఆ సైట్‌ రాసిన వార్త వల్లే సినిమా ఆగిపోయిందని నాకు తెలిసింది.” అంటూ సాయి తేజ్ కౌంటర్ వేశారు.
ఇక నిర్మాణ సంస్థను నెలకొల్పాలనే కోరిక ఇన్నాళ్లకు నెరవేరిందని.. దానికి విజయ దుర్గ ప్రొడక్షన్స్‌ అనే పేరు పెట్టినట్లు సాయి చెప్పారు. ఇక రామ్ చరణ్‌తో కలిసి నటించే అవకాశం ఉందా? అనే ప్రశ్నకి ఆసక్తికర సమాధానం ఇచ్చారు. “నాగబాబు, పవన్‌ కల్యాణ్‌ మావయ్యలతో కలిసి నటించాను. తర్వాత చిరంజీవి మావయ్యతో తెరను పంచుకోవాలనేది నా టార్గెట్. ఆ కల పూర్తయ్యాక మా ఫ్యామిలీలోని ఇతర హీరోలతో కలిసి నటిస్తా” అంటూ సాయి తేజ్ చెప్పారు.
