బాలీవుడ్ యువ నటుడు సుశాంత్ సింగ్ రాజ్‌పుత్ మృతి కేసు విచారణ జరుగతున్న విషయం తెలిసిందే. ఈ కేసులో రోజుకో సంచలనం బయటపడుతోంది. ఎన్నెన్నో మలుపులు తిరుగుతోంది. ఇప్పటికే సుశాంత్ మృతి కేసును సీబీఐ అధికారులు విచారణ జరుపుతున్నారు. ఈ కేసుతో సంబంధం ఉన్న పలువురిని ప్రశ్నిస్తున్నారు. ప్రధానంగా ఆరోపణలు ఎదుర్కొంటున్న సుశాంత్ ప్రియురాలు రియా చక్రవర్తితో పాటు ఆమె సోదరుడిని సీబీఐ అధికారులు ప్రశ్నించారు. తాజాగా రియా చక్రవర్తి డ్రగ్స్‌కు సంబంధించి ఓ వ్యక్తితో చేస్తున్న వాట్సాప్ చాట్‌ ఒకటి బయటపడింది. దీనిని సీబీఐ అధికారులకు ఈడీ అధికారులు అందించారు.
సీబీఐ కంటే ముందు ఈడీ అధికారులు రియాను ప్రశ్నించిన సంగతి తెలిసిందే. డ్రగ్స్‌ పేరుతో రియాకు నేరుగా సంబంధాలున్నట్టు ఈడీ విచారణలో తేలింది. డ్రగ్స్‌ గురించి వాట్సాప్ చాట్‌లో రియా సంభాషించినట్లు ఈడీ దర్యాప్తులో వెల్లడైంది. రియా కాల్‌ డేటాను ఈడీ, సీబీఐ అధికారులు కలిసి విశ్లేషించే అవకాశముంది. దర్యాప్తులో భాగంగా రియా, ఆమె కుటుంబ సభ్యుల ఫోన్లు, ల్యాప్‌టాప్‌లను ఈడీ ఇప్పటికే స్వాధీనం చేసుకుంది. డ్రగ్‌ డీలర్‌గా ఆరోపణలు ఎదుర్కొంటున్న గౌరవ్‌ ఆర్యతో రియా చాట్‌ చేసింది. రియా చక్రవర్తిని అరెస్టు చేసేందుకు సీబీఐ అధికారులు రంగం సిద్ధం చేస్తున్నట్లు తెలుస్తోంది.
