పవన్ కల్యాణ్ మాజీ భార్య, నటి రేణు దేశాయ్ తనపై వస్తున్న వదంతులపై ఎమోషనల్ అయ్యారు. తన ఆవేదనను ఫేస్బుక్ ద్వారా వ్యక్తం చేశారు. పవన్ కళ్యాణ్‌తో విడిపోయిన తర్వాత తన ఇద్దరు పిల్లలతో కలిసి పుణెలో ఉంటున్నారు రేణు దేశాయ్. నటిగా కంటే పవన్ కళ్యాణ్ మాజీ భార్యగా ఎంతో ఫేమస్ అయిన రేణు దేశాయ్ తనపై వస్తున్న వదంతులపై ఘాటుగా స్పందించారు. పవన్ కల్యాణ్ ఓ ఖరీదైన ఇంటిని రేణు దేశాయ్‌కు బహుమతిగా ఇచ్చారని కొన్నిరోజులుగా వార్తలు వస్తున్న సంగతి తెలిసిందే. ఆద్య, అకీరాల కోసం హైదరాబాద్‌లో పవన్ ఇల్లు కొనిచ్చారని ఇప్పుడు రేణు తన పిల్లలతో కలిసి పుణె నుంచి హైదరాబాద్‌లోని ఇంటికి మారుతున్నట్టు వార్తలొచ్చాయి. ఆ వదంతులను ఆమె తీవ్రంగా ఖండించారు. ఇలాంటి తప్పుడు వార్తలు తనపై ఎందుకు సృష్టిస్తున్నారో అర్థం కావడం లేదంటూ ఫేస్‌బుక్‌లో తన ఆవేదనను వెల్లడించారు. హైదరాబాద్‌లో తన కష్టార్జితంతో ఒక్కో రూపాయి కూడబెట్టుకుని ఇల్లు కొనుక్కున్నట్లు ఆమె తెలిపారు. అంతకు ముందు ఎన్నడూ లేనంతగా ఎమోషనల్ అయ్యారు.
రేణు దేశాయ్ ఫేస్బుక్ పోస్ట్
నేను ఇప్పుడు మీ అందరికీ ఈ విషయం గురించి వివరణ ఇవ్వడానికి ఒకే ఒక్క కారణం, నిన్నటి నుండి నాకు మీడియా వాళ్ళ నుండి, స్నేహితుల నుండి వస్తున్న ఎన్నో మెసేజెస్, ఫోన్ కాల్స్ ఆధారంగా నాకు ఈ విషయం చాలా సీరియస్ అయింది అని అర్థమయ్యింది. వాళ్ళు చెప్పింది విని నాకు చాలా బాధ వేసింది అందుకే ఈ వివరణ…
ఒక వ్యక్తి నిజమైన ఆస్తి తన ఆత్మగౌరవం…
ఒక వ్యక్తి నిజమైన ఆస్తి తన నిజాయితీ…
ఒక వ్యక్తి నిజమైన ఆస్తి తన అస్తిత్వం…
ఇది మీకు తెలియనిదా??!!
నేను, నా జీవిత మనుగడ కోసం ఒంటరిగా, తీవ్రంగా, నిబద్దతతో ఎంతగానో శ్రమిస్తున్నాను… శ్రమిస్తూనే పోరాడుతున్నాను…నేనిప్పటివరకూ కనీసం మా తండ్రి గారి దగ్గర్నుంచి కూడా ఏ రకమైన ఆర్థిక సహాయం ఆశించలేదు, పొందలేదు…అలాగే, నేనిప్పటివరకూ నా మాజీ భర్త దగ్గర్నుంచికూడా ఎలాంటి అన్యాయపూరితమైన భరణాన్నీ ఆశించలేదు, పొందలేదు…అది నా వ్యక్తిత్వం!!! అయినప్పటికీ మీరు నా గురించి అన్యాయంగా, అసంబద్దమైన అబద్దపు వార్తలను ప్రచారం చేస్తూనే ఉన్నారు!
మీరందరూ అనుకుంటున్నట్టూ, ప్రచారం చేస్తున్నట్టూ ఇప్పుడు హైదరాబాద్‌లో నేను కొన్న ఫ్లాట్ నిజంగా మాకెవరూ కొనివ్వలేదు. అది నా కష్టార్జితంతో ఒక్కో రూపాయి కూడబెట్టుకుని కొనుక్కున్న నా సొంత ఇల్లు…అది నా మాజీ భర్త మాకు కొనిచ్చారన్న ఇలాంటి అసత్య ప్రచారాల వల్ల నా నిజాయితీకీ, ఆత్మగౌరవానికీ, నా అస్థిత్వానికీ, చివరగా నా ఉనికికే ప్రమాదం సంభవిస్తుందనే చిన్న ఆలోచన మీకెవ్వరికీ రాలేదా??? నాకు తెలిసినంతవరకూ, ఈ వార్తకూ నా మాజీ భర్తకూ ఎలాంటి సంబంధం ఉండి ఉండదు… కనీసం ఈ ప్రచారం ఆయన దృష్టికి కూడా వెళ్ళి ఉండదు… అలాంటిది, ఒక వార్తను రాసేటప్పుడు, అది నిజమో కాదో నిర్ధారించుకోకుండానే, అత్యుత్సాహంతోనో, తొందరపాటుతోనో, లేక మీ సంస్థల మనుగడకోసమో, ఒక ఒంటరి స్త్రీ మనుగడను ప్రమాదంలో నెట్టడం ఎంతవరకూ సమంజసం???
ఇలాంటి వార్తలు ఎంత వేగంగా ప్రజల్లోకి వెళ్తాయో మీకు తెలియదా? ప్రజలు ఈ అబద్దపు వార్తను నిజమని నమ్మితే, సంఘంలో నాకున్న గౌరవం మసకబారదా? ఏది జరిగినా చెక్కు చెదరని నా అస్థిత్వం, వ్యక్తిత్వం, నా ఆత్మగౌరవం, నేను అనే ఒక నిజం అసత్యం అయిపోదా? నా ఆత్మ ఎంత ఘోషిస్తుంది!! ఎంతలా చితికిపోతుంది!!? దయచేసి ఆలోచించండి. నా ఈ జీవితంలో ఇప్పటివరకూ ఏ మగవాడి సాయం లేకుండా సాగుతున్న నాలాంటి ఒంటరి తల్లి జీవన గమనానికీ, పోరాటానికి గౌరవం ఇవ్వకపోయినా సరే… దయచేసి, ఇలా కించపరచకండి. నేను మీతో పంచుకుంటున్న ఈ బాధను సరిగ్గా అర్థం చేసుకోకుండా మళ్ళీ నాకూ, నా మాజీ భర్త అభిమానులకూ మధ్య, దయచేసి ఎలాంటి గొడవలూ సృష్టించకండి..
మీ
రేణూ దేశాయ్ అంటూ పోస్ట్ చేశారు.
