హీరోయిన్ రెజీనా… జయాపజయాల సంగతి అటుంచితే, పాత్రకి న్యాయం చేస్తూ నటన పరంగా మంచి మార్కులు కొట్టేస్తోంది. ఈ మధ్య కాలంలో వచ్చిన ‘ఎవరు’ సినిమా ఆమెకి మంచి పేరు తెచ్చిపెట్టింది. ప్రస్తుతం ఆమె తమిళంలో ఒక సినిమా చేయడానికి సిద్ధమవుతోంది.
జనవరి 2వ వారం నుంచి చెన్నై లో ఈ సినిమా షూటింగ్ మొదలుకానుంది. నాయిక ప్రాధాన్యత కలిగిన ఈ సినిమాకి కార్తీక్ రాజు దర్శకత్వం వహించనున్నాడు. భవిష్యత్తులో ఏం జరుగుతుందో లెక్క తప్పకుండా జోస్యం చెప్పే పాత్రలో రెజీనా కనిపిస్తుందని అంటున్నారు. ఈ పాత్ర చాలా విలక్షణమైనది కావడంతో, తన కెరియర్లో ప్రత్యేకమైన స్థానాన్ని సంపాదించుకుంటుందని రెజీనా భావిస్తోంది. ఈ సినిమా హిట్ కొడితే, నాయిక ప్రాధాన్యత కలిగిన సినిమాలు మరికొన్ని ఆమె తలుపు తట్టడం ఖాయమనే వార్తలు వినిపిస్తోంది.
