Aavesham On OTT: ఇటీవలి కాలంలో మలయాళంలో బ్లాక్ బస్టర్ అయిన చిత్రాలను తెలుగులోకి డబ్ చేసి థియేటర్లలో రిలీజ్ చేస్తున్నారు. వీటికి కలెక్షన్లు కూడా బాగానే వస్తున్నాయి. ఈ మధ్య భ్రమయుగం, ప్రేమలు, మంజుమ్మల్ బాయ్స్ చిత్రాలను ఇలానే డబ్ చేసి తెలుగులో కూడా రిలీజ్ చేశారు. అయితే ‘పుష్ప’ విలన్ ఫహాద్ ఫాజిల్ హీరోగా నటించిన చిత్రం ‘ఆవేశం’.
ఈ ఆవేశం సినిమాను కూడా తెలుగులో డబ్ చేసి రిలీజ్ చేస్తారని టాక్ నడిచింది. అదీ కాకుండా చాలా మంది తెలుగు ఆడియన్స్ ఈ సినిమాను డబ్ చేసి రిలీజ్ చేయాలంటూ మైత్రీ మూవీ మేకర్స్‌ను ట్యాగ్ చేస్తూ సోషల్ మీడియాలో పోస్టులు పెట్టారు.
కానీ ఇంతలోనే.. ఓటీటీ రిలీజ్‌పై బజ్ వచ్చింది. ఈ సినిమాతో ఫహాద్ ఫాజిల్ భారీ బ్లాక్ బస్టర్ హిట్‌ కొట్టిన సంగతి తెలిసిందే. మలయాళంలో రిలీజైన ఈ సినిమా ఇప్పటికే బాక్సాఫీస్ దగ్గర రూ.130 కోట్లకి పైగా వసూళ్లు సాధించి దూసుకుపోతుంది. రంగా పాత్రలో తనదైన నటనతో ఫహాద్ అందరినీ ఆకట్టుకున్నారు.
సోషల్ మీడియాలో ఎక్కడ చూసినా ఫహాద్ పాత్ర గురించే పోస్టులు కనిపిస్తున్నాయి. ప్రస్తుతం థియేటర్లలో అదరగొడుతున్న ఈ సినిమా త్వరలో ఓటీటీలో సందడి చేయనుంది. ఈ యాక్షన్-కామెడీ ఎంటర్‌టైనర్ మే 9 గురువారం నుంచి అమెజాన్ ప్రైమ్ వీడియోలో మ‌ల‌యాలంతో పాటు తెలుగు, క‌న్న‌డ, త‌మిళ భాష‌ల్లోనూ స్ట్రీమింగ్‌కు తీసుకు వ‌స్తున్నారు.
జిత్తు మాధవన్ రాసి డైరెక్ట్ చేసిన ఈ చిత్రంలో రోషన్ షానవాస్, మిథున్ జై శంకర్, సజిన్ గోపు, మన్సూర్ అలీ ఖాన్ కీలక పాత్రలు పోషించారు. అన్వర్ రషీద్ ఎంటర్‌టైన్‌మెంట్స్, ఫహాద్ ఫాజిల్ అండ్ ఫ్రెండ్స్ సంయుక్తంగా ఈ సినిమాను నిర్మించారు. సుశిన్ శ్యామ్ మ్యూజిక్ అందించారు.
ఫహాద్ ఫాజిల్ విషయానికొస్తే ఓవైపు నిర్మాతగా మరోవైపు నటుడిగా వరుస సినిమాలతో దూసుకుపోతున్నారు. ఇప్పటికే ఆవేశంతో బ్లాక్ బస్టర్ విజయం అందుకున్న ఫహాద్ ఈ ఆగస్టు 15కి పుష్ప 2తో రాబోతున్నారు. ఇందులో విలన్ పాత్రలో నటించారు ఫహాద్. దీంతో పాటు సూపర్ స్టార్ రజినీ కాంత్ నటిస్తున్న ‘వెట్టయాన్’లో కూడా ఫహాద్ కీలక పాత్రలో కనిపిస్తున్నారు. ఇవి కాకుండా ఈ ఏడాది మరో రెండు చిత్రాలు కూడా రిలీజ్‌కి రెడీ అవుతున్నాయి.
