టాలీవుడ్ నటుడు మంచు విష్ణు హిట్‌ ఫ్లాప్‌లతో సంబంధం లేకుండా వరుస సినిమాలు చేస్తున్నాడు. ఆయన తాజాగా ప్రకటించిన చిత్రం ‘కన్నప్ప’. ఇది మంచు విష్ణు కలల ప్రాజెక్టు. విష్ణు హీరోగా, నుపూర్ సనన్ హీరోయిన్‌గా నటిస్తున్న ఈ సినిమా ఇటీవలే హైదరాబాద్‌లో పూజా కార్యక్రమాలతో మొదలైంది. మోహన్‌ బాబు నిర్మాతగా వ్యవహరిస్తున్న ఈ చిత్రానికి ముఖేశ్ కుమార్ సింగ్ దర్శకత్వం వహిస్తున్నారు. ప్రస్తుతం విదేశాల్లో షూటింగ్ జరుగుతున్నట్లు తెలుస్తోంది. తాజాగా ఈ సినిమా నుంచి ఆసక్తికర విషయం బయటకు వచ్చింది.
తాజాగా ఈ సినిమా గురించి ఓ ఆసక్తకర వార్త సోషల్‌ మీడియాలో చక్కర్లు కొడుతుంది. పాన్‌ ఇండియా స్టార్ ప్రభాస్ ఈ సినిమాలో కీలక పాత్ర పోషిస్తాడన్న వార్త హల్ చల్ చేస్తోంది. ప్రముఖ విమర్శకుడు రమేష్ బాలా ఈ విషయాన్ని ట్విట్టర్‌‌లో వెల్లడించారు. సినిమాలో ప్రభాస్ ఓ ముఖ్యమైన పాత్ర పోషిస్తున్నారని విశ్వసనీయవర్గాల ద్వారా తెలిసిందని పేర్కొన్నారు. ఈ ట్వీట్ కి మంచు విష్ణు బదులిస్తూ.. ‘హరహర మహాదేవ్’ అంటూ రీట్వీట్ చేశాడు. దాంతో, ప్రభాస్ నిజంగానే ఈ చిత్రంలో నటిస్తున్నాడా? నటిస్తే ఏ పాత్రలో కనిపిస్తాడు? అన్నది ఆసక్తి కలిగిస్తోంది.
