యంగ్‌ హీరోయిన్‌ పాయల్‌ రాజ్‌పుత్‌ తమ్ముడు మూడేళ్ల నుంచి కనిపించడంలేదట. అతను ఇల్లు వదిలి వెళ్లి నేటికి మూడేళ్లు అవుతోందంటూ బాధపడుతున్నారు పాయల్‌. ఈ విషయాన్ని ఆమె ఇన్‌స్టాగ్రామ్‌ పోస్ట్‌ ద్వారా తెలియజేశారు. ‘నా సోదరుడు కనిపించడంలేదు. అతను మమ్మల్ని వదిలి వెళ్లి నేటికి మూడేళ్లు అవుతోంది. 2016 మార్చ్‌ 27న ముంబయిలో రాత్రి 7 గంటలకు ఇంట్లో నుంచి వెళ్లిపోయాడు. తమ్ముడు గురించి ఆలోచించకుండా ఒక్కరోజు కూడా ఉండలేకపోతున్నాం’
‘మళ్లీ నిన్ను చూస్తామన్న ఆశ రోజూ కలుగుతూనే ఉంటుంది. ఈరోజు నీ పుట్టినరోజు. హ్యాపీ బర్త్‌డే తమ్ముడు.. దేవుడు నీకు ఆయురారోగ్యాలు ఇవ్వాలని ఆశిస్తున్నాను. నువ్వెక్కడున్నా త్వరగా ఇంటికి వచ్చేయ్. అమ్మానాన్న రోజూ నీకోసం దేవుడిని ప్రార్థిస్తూనే ఉన్నారు. నిన్ను చాలా మిస్సవుతున్నాం. వారిని బాధలో వదలి వెళ్లిపోయావు. నువ్వు లేవని వారు రోజూ కుమిలిపోతున్నారు. నువ్వు ఈ మెసేజ్‌ చూస్తావని ఆశిస్తున్నాను. ఒకవేళ నువ్వు రాలేని పరిస్థితిలో ఉంటే మాకు ఒక్కసారి ఫోన్‌ చెయ్యి. నీకోసం ఎదురుచూస్తుంటాం.’
‘చాలా సార్లు పోలీసులకు ఫిర్యాదు చేశాం. కానీ సోదరుని గురించి ఇంతవరకు ఎలాంటి సమాచారం రాలేదు. అందుకే అతని ఫోటోలను పోస్ట్‌ చేస్తున్నాను. అతని పేరు ధృవ్‌ రాజ్‌పుత్‌. వయసు 25. చివరిగా అతన్ని ముంబయిలో చూశాం. మీరెక్కడైనా తనని చూసుంటే మాకు సమాచారం అందించగలరు’ అని పేర్కొన్నారు పాయల్‌.
