ప్రముఖ నటుడు కమల హాసన్ హీరోగా నటిస్తున్న చిత్రం ‘విక్రమ్’. కమల్ సొంత బ్యానర్లో నిర్మితమైన ఈ సినిమాకి లోకేశ్ కనగరాజ్ దర్శకత్వం వహించాడు. జూన్ 3వ తేదీన ఈ సినిమాను ప్రపంచవ్యాప్తంగా విడుదల చేయనున్నారు. తెలుగులో ఈ సినిమాను హీరో నితిన్ తన సొంత బ్యానర్లో విడుదల చేస్తున్నాడు. తెలుగు వెర్షన్ కి సంబంధించిన ప్రీ రిలీజ్ ఈవెంట్ ను ఈ రోజు సాయంత్రం హైదరాబాద్ – శిల్పకళావేదికలో నిర్వహించనున్నారు.
ఈ రోజు సాయంత్రం 6 గంటల నుంచి ఈ వేడుక ప్రారంభం కానుంది. ఈ వేడుకకి ముఖ్య అతిథిగా వెంకటేశ్ రానున్నారు. కమల్ .. వెంకీల మధ్య ‘ఈనాడు’ సినిమా నుంచి మంచి సాన్నిహిత్యం ఉంది. ఈ సినిమా ప్రీ రిలీజ్ వేడుకలో కమల్ చేతుల మీదుగా నితిన్ ‘మాచర్ల నియోజక వర్గం’ సినిమాకి సంబంధించిన ఫస్టు లిరికల్ సాంగ్ ను రిలీజ్ చేయిస్తున్నారు. మహతి స్వరసాగర్ సంగీతాన్ని సమకూర్చారు. ఈ సినిమాలో కృతి శెట్టి – కేథరిన్ హీరోయిన్‌లుగా అలరించనున్నారు. ఆగస్టు 12వ తేదీన ఈ సినిమాను విడుదల చేయనున్నారు.
