హీరో నిఖిల్ ప్రతి సినిమాలో కొత్త కంటెంట్‌తో కనిపించేందుకు ప్రాధాన్యత ఇస్తున్నాడు. వరుస సినిమాలతో తన రేంజ్‌ను పెంచుకుంటూ వెళ్తున్నాడు. ‘కార్తికేయ 2’తో నిఖిల్ పాన్ ఇండియా ఇమేజ్‌ను సంపాదించుకున్నాడు. ఆ తరువాత వచ్చిన ‘స్పై’ మాత్రం ప్రేక్షకులను నిరాశపరిచింది.
ప్రస్తుతం నిఖిల్ వంశీకృష్ణ డైరెక్షన్‌లో ఓ సినిమా చేస్తున్నాడు. ఈ సినిమాకి ‘ది ఇండియా హౌస్’ అనే టైటిల్ ఖరారు చేసినట్టు తెలుస్తోంది. మరో వైపు ‘స్వయంభూ’ సినిమాను కూడా పూర్తిచేసే పనిలో ఉన్నాడు. భరత్ కృష్ణమాచారి దర్శకత్వం వహిస్తున్న ఈ సినిమాలో యుద్ధవీరుడిగా నిఖిల్ కనిపించబోతున్నాడు.
నిఖిల్ మరో ప్రాజెక్టును కూడా లైన్లో పెట్టినట్టు తెలుస్తోంది. గతంలో నిఖిల్‌తో ‘ఎక్కడికిపోతావు చిన్నవాడా’ అనే సినిమాను దర్శకుడు వీఐ ఆనంద్ రూపొందించాడు. ఆ సినిమా బ్లాక్ బస్టర్‌గా నిలవడమే కాకుండా రూ.30 కోట్లకు పైగా వసూళ్లు సాధించింది. ఇప్పుడు అదే సినిమాకు సీక్వెల్ చేయబోతున్నట్లు తెలుస్తోంది. ఈ సినిమాను జీఏ2 పిక్చర్స్ సంస్థ నిర్మించబోతున్నారట. దీనికి సంబంధించి పూర్తి వివరాలు త్వరలోనే ప్రకటన వెలువడనుంది.
