Bharateeyudu 2 pre release event:
కమల్ హాసన్ హీరోగా శంకర్ దర్శకత్వంలో త్వరలో ప్రేక్షకులు ముందుకు రాబోతున్న భారతీయుడు 2 సినిమాపై మంచి అంచనాలు ఉన్నాయి. కానీ గేమ్ చేంజర్ సినిమా విషయంలో అప్డేట్లు లేకపోవడంతో మెగా అభిమానులు శంకర్ పై కొంత కోపంగా ఉన్నారు. ఈ ఎఫెక్ట్ భారతీయుడు 2 పైన పడుతుందేమోనని అందరూ అనుకున్నారు.
కానీ తాజాగా జరిగిన భారతీయుడు ప్రీ రిలీజ్ ఈవెంట్ లో శంకర్ గేమ్ చేంజర్ సినిమా గురించి అప్డేట్ ఇవ్వడం సినిమాలో కీలక పాత్ర పోషిస్తున్న ఎస్ జే సూర్య పవన్ కళ్యాణ్ గురించి వేదికపై మాట్లాడటం మెగా అభిమానులకు బాగా సంతోషం కలిగించింది. ఈ నేపథ్యంలో మెగా అభిమానులు కూడా భారతీయుడు 2 సినిమాని బాగానే ప్రమోట్ చేస్తున్నారు.
గేమ్ చేంజర్ సినిమా గురించి మాట్లాడుతూ శంకర్ రామ్ చరణ్ ది ఎక్సలెంట్ స్క్రీన్ ప్రజెన్స్ అని అన్నారు. “అతని దగ్గర ఒక కంట్రోల్డ్ పవర్ ఉంది. ఎప్పుడు బ్లాస్ట్ అవుతుందా అన్నట్టు ఉంటుని. అది మీకు సినిమా చూస్తే మీకు అర్థమవుతుంది” అని అన్నారు శంకర్. అంతేకాకుండా ఇంకో పది పదిహేను రోజుల్లో షూటింగ్ పూర్తయిపోయి ఫైనల్ కట్ వస్తుందని అన్నారు.
అయితే విడుదల తేదీ గురించి శంకర్ మాట్లాడకపోవడం కొంత నిరాశ కలిగించింది కానీ శంకర్ ఎలివేషన్ మెగా ఫ్యాన్స్ కి బాగా నచ్చింది. మరోవైపు భారతీయుడు 2 లో కీలక పాత్ర పోషించిన ఎస్ జే సూర్య కూడా పవన్ కళ్యాణ్ గురించి గొప్పగా మాట్లాడారు.
“దేశం కోసం గొప్ప పనులు చేసేవాళ్ళు నిజమైన ఇండియన్స్. అందులో నా స్నేహితుడు, ఆంధ్ర ప్రదేశ్ డిప్యూటీ ముఖ్య మంత్రి పవన్ కళ్యాణ్ కూడా ఒకరు. నేను మూడేళ్ల ముందే చెప్పాను ఏదో ఒకరోజు నా ఆంధ్ర ప్రదేశ్ ముఖ్య మంత్రి పవన్ కళ్యాణ్ నా స్నేహితుడు అని గౌరవంగా చెప్పుకుంటాను అని. అందులో సగం నిజమయ్యింది. మిగతా సగం మీరు నిజం చేయాలి” అంటూ ఎస్ జె సూర్య చేసిన కామెంట్స్ కూడా మెగా ఫ్యాన్స్ బాగానే ట్రెండ్ చేశారు.
చూస్తూ ఉంటే శంకర్ మీద మెగా ఫ్యాన్స్ కి ఉన్న నెగటివిటీ కొంత తగ్గింది అని చెప్పచ్చు. భారతీయుడు 2 సినిమా పై కూడా ఇప్పుడు బాగానే అంచనాలు వచ్చాయి. మరి సినిమా ఎంతవరకు హిట్ అవుతుందో చూడాలి.
