టాలీవుడ్‌ సూపర్‌ స్టార్‌ మహేష్‌ బాబు హీరోగా నటిస్తున్న చిత్రం ‘సరిలేరు నీకెవ్వరు’. క్రేజీ డైరెక్టర్‌ అనిల్‌ రావిపూడి ఈ చిత్రానికి దర్శకత్వం వహిస్తున్నారు.. రష్మిక మందన హీరోయిన్‌గా నటిస్తున్నారు. ఇప్పటికే షూటింగ్‌ పూర్తి చేసుకున్న ఈ చిత్రం తాజాగా సెన్సార్‌ కార్యక్రమాలను కూడా పూర్తి చేసుకుంది. గురువారం సెన్సార్‌ బోర్డు సభ్యులు ఈ చిత్రాన్ని వీక్షించి ఎలాంటి సీన్లు కట్‌ చేయకుండా యూ/ఏ సర్టిఫికేట్‌ ఇచ్చారని చిత్ర బృందం ప్రకటించింది. దాదాపు 160 నిమిషాల నిడివి గల ఈ ఫుల్‌ ఎంటర్‌టైనర్‌ మూవీ అందరినీ ఆకట్టుకునేవిధంగా, మహేష్‌ ఇమేజ్‌ను దృష్టిలో పెట్టుకుని దర్శకుడు తెరకెక్కించారని చిత్ర వర్గాలు పేర్కొన్నాయి. అంతేకాకుండా మహేష్‌-అనిల్‌ రావిపూడి కాంబినేషన్‌లో బ్లాక్‌బస్టర్‌ హిట్‌గా ‘సరిలేరు నీకెవ్వరు’ నిలవడం ఖామయని జోస్యం చెబుతున్నారు.
మామూలుగానే మహేష్‌ సినిమా అంటే అభిమానుల్లో అంచనాలు ఓ రేంజ్‌లో ఉంటాయి. ఈ అంచనాలకు తోడు ఇప్పటికే విడుదలైన పాటలు, టీజర్‌లతో సినిమాపై హై ఎక్స్‌పెక్టేషన్స్‌ నెలకొన్నాయి. ఇక ఈ చిత్రంతో టాలీవుడ్‌ లేడీ సూపర్‌స్టార్‌ విజయశాంతి సినిమాల్లోకి రీఎంట్రీ ఇస్తున్నారు. అంతేకాకుండా ఈ సినిమాలో విజయశాంతి పవర్‌ఫుల్‌ పాత్రలో కనిపించనున్నారని సమాచారం. రాజేంద్ర ప్రసాద్‌, ప్రకాష్‌ రాజ్‌, సంగీత, కౌముది తదితరులు నటిస్తున్న ఈ చిత్రానికి దేవిశ్రీ ప్రసాద్‌ సంగీతమందిస్తున్నారు. అనిల్‌ సుంకర, ‘దిల్‌’ రాజు, మహేశ్‌బాబు నిర్మించిన ఈ చిత్రం సంక్రాంతి కానుకగా జనవరి 11 ప్రేక్షకుల ముందుకు రానుంది.
