Kajal Aggarwal to Alia Bhatt: వెండితెర మీద ఎవర్‌గ్రీన్‌ అనుకుంటున్నారు హీరోయిన్లు. పెళ్లి చేసుకుని తల్లైన తరువాత కూడా ఆకట్టుకుంటున్నారు. ముఖంపై రంగు వేసుకుని నటనాభినయం చేస్తున్నారు. యాక్టింగ్‌తో పాటు గ్లామర్ పరంగా యంగ్‌ హీరోయిన్లతో పోటీ పడుతున్నారు.
సౌత్ నుంచి నార్త్‌ వరకూ ఈ బ్యూటీస్‌ వెండితెరపై సత్తా చూపిస్తున్నారు. చాలామంది హీరోయిన్లు పెళ్లి చేసుకున్న తరువాత సినిమాలకు దూరం అవుతుంటారు. అయితే మారుతున్న కాలంలో కొత్తతరం తారలు స్ర్కీన్‌ మీదకు వస్తున్నారు. ఎంతో మంది అభిమానులను సంపాదించుకుంటున్నారు. తమకంటూ ఓ మార్కెట్‌ క్రియేట్ చేసుకుంటున్నారు. అందులో ఒకరు టాలీవుడ్‌ చందమామ కాజల్.
కాజల్ గౌతమ్‌ కిచ్లుని పెళ్లి చేసుకుంది. వీరికి నీల్‌ కుచ్లు అనే బాబు కూడా ఉన్నాడు. అయితే కాజల్ పెళ్లి తరువాత కూడా ఇండస్ట్రీకి దూరం కాలేదు. అభిమానులను మరింతగా అలరించాలనుకుంటుంది. ఒకవైపు వెబ్‌సిరీస్‌లకు సైన్ చేస్తుంది. మరోవైపు హీరోలతో ఆడిపాడే సినిమాలను తగ్గించి లేడీ ఓరియంటెండ్‌ మూవీలకు ఓకే చెప్తోంది. కాజల్ పోలీస్‌ పాత్రలో నటించిన సత్యభామ సినిమా విడుదలకు రెడీగా ఉంది. తొలిసారి కాజల్ యాక్షన్‌ మూవీలో సరికొత్తగా కనిపించబోతుంది. బిడ్డకు తల్లైన తరువాత కూడా రిస్కీ పాత్రలకు సై అంటుంది. అభిమానుల కోసం ఏమి చేయడానికైనా సిద్ధం అంటోంది. సెకండ్ ఇన్నింగ్స్‌లో తనలోని మరో కోణాన్ని చూపించబోతుంది.
లక్ష్మీకల్యాణం మూవీతో టాలీవుడ్‌కు పరిచయమైన కాజల్ ఆ తర్వాత చందమామ తెలుగు ప్రేక్షకుల మనసుల్లో స్థానం సంపాదించుకుంది. యూత్‌కు ఆరాధ్య దేవతగా మారిపోయింది. మగధీర వంటి సంచల చిత్రాల్లో నటించి బ్లాక్ బస్టర్ విజయాలను ఖాతాలో వేసుకుంది. సౌత్‌తో పాటు నార్త్‌లోనూ తన గ్లామర్‌ను చూపించింది. సౌత్, నార్త్‌లో నటించిన ఈ అందగత్తెలు మంచి గుర్తింపును తెచ్చుకుంటున్నారు. స్టార్స్‌తో జోడీ కట్టి గ్లామర్‌తో ఆకట్టుకుంటున్నారు. తమకంటూ అభిమానులను సంపాదించుకుంటున్నారు. పెళ్లయినా, మదర్‌గా మారినా అవకాశాలు దక్కించుకుంటున్నారు.
పోకిరీలో నటించిన ఇలియానా టాలీవుడ్‌లో యూత్‌కు నిద్రలేకుండా చేసింది. ఈ సన్నజాజి కోసమే సినిమాకు వచ్చే ప్రేక్షకులను సంపాదించుకుంది. పెద్ద స్టార్స్ పక్కన ఆడి పాడింది. తెలుగులో కోటి రూపాయల పారితోషికం తీసుకున్న మొదటి హీరోయిన్‌గా పేరు తెచ్చుకుంది. గతేడాది పండంటి మగబిడ్డకు జన్మనిచ్చింది ఇలియానా. ఇక ఈ ఏడాది ఈ ముద్దుగుమ్మ నటించిన హిందీ సినిమా దో ఔర్ దో ప్యార్ విడుదలైంది. ఈ సినిమాలో రొమాంటిక్ సన్నివేశాల్లో కూడా నటించింది. ప్రస్తుతం తేరా క్యా హోగా లవ్‌లీ చిత్రంలో నటిస్తోంది.
అమ్మతనంలోకి ప్రమోషన్ తీసుకున్న హీరోయిన్లు వెండితెరపై అందాలను ప్రదర్శించడంలో ఏమాత్రం తగ్గేదే లేదంటున్నారు. ఓ వైపు అందాలతో ఆకట్టుకుంటున్నారు. మరోవైపు లేడీ ఓరియెంటెడ్ మూవీలతో సత్తా చూపిస్తున్నారు. దర్శకుడు విఘ్నేశ్ శివన్‌ను పెళ్లాడింది నయనతార. పెళ్లయిన 4 నెలలకు ఈ జంట ఇద్దరు కవలలకు జన్మకూడా ఇచ్చారు. ప్రస్తుతం ఈ అందగత్తెకు డిమాండ్ ఏమాత్రం తగ్గలేదు. అటు జవాన్‌తో బాలీవుడ్‌లో ఎంట్రీ ఇచ్చింది. ఇక్కడ ఆఫర్స్ దక్కించుకుంటోంది. సౌత్‌లోనూ సత్తా చూపిస్తోంది.
చంద్రముఖి సినిమాతో గుర్తింపు తెచ్చుకున్న నయనతార ఆ తర్వాత లక్ష్మి సినిమాతో తెలుగు ప్రేక్షకులను ఆకట్టుకుంది. పెద్ద హీరోలకు ఫస్ట్ ఛాయిస్‌గా మారింది. తెలుగుతో పాటు సౌత్‌లోని ఇతర భాషల్లోనూ వరుసగా సినిమాలు చేస్తూ మెప్పించింది. హీరోలతో ఆడి పాడుతూ లేడీ ఓరియెంటెడ్ మూవీస్‌తో తనకంటూ ఓ మార్కెట్‌ను క్రియేట్ చేసుకుంది.. లేడీ అమితాబ్‌గా పేరుతెచ్చుకుంది నయనతార.
కంటెంట్ సినిమాలతో ప్రేక్షకులను ఆకట్టుకుంటూ బాక్సాఫీస్ వద్ద మంచి విజయాలను అందుకున్న ఈ భామ డేట్స్ దొరకాలంటే ఎదురుచూసేలా ఇమేజ్ క్రియేట్ చేసుకుంది. హీరోయిన్లు తల్లయిన తర్వాత కూడా అందాన్ని కాపాడుకుంటున్నారు. అందుకు తగ్గట్టు కసరత్తులు చేస్తున్నారు. ఓ వైపు కుటుంబ బాధ్యతలు, మరోవైపు కెరీర్‌ను జాగ్రత్తగా ప్లాన్‌చేసుకుంటున్నారు. సెకండ్ ఇన్నింగ్స్‌లో డిఫరెంట్ పాత్రలను ఎంచుకుంటున్నారు. 2020 లాక్‌డౌన్ సమయంలో శ్రియ జీవితం సరికొత్త రంగులతో నిండిపోయింది. ఓ అందమైన బిడ్డకు జన్మనిచ్చింది.
ఇష్టం సినిమాతో వెండితెరకు పరిచయమైన శ్రియ ఎందరికో ఇష్టంగా మారిపోయింది. అమాయక చూపులతో ప్రేక్షకులకు, చూడచక్కని రూపంతో ఇటు కుర్రకారుకు దగ్గరైంది. శ్రియ బిడ్డను కన్న తర్వాత కూడా గ్లామర్‌షోకు ఏమాత్రం వెనకాడటం లేదు. అభిమానులను అలరించేలా స్కిన్ షో చేస్తూనే ఉంది. అలాగే మంచి పాత్రలతో అలరించే ప్రయత్నం చేస్తోంది. హీరోయిన్లు పిల్లలను కన్న తర్వాత కూడా ఇంకా నటించడం అనేది సౌత్ కంటే బాలీవుడ్‌లోనే ఎక్కువ అని చెప్పాలి.
బిగ్ హీరోయిన్లు అటు నిజ జీవితంలో తల్లులుగా ఇటు వెండితెరపై నటీమణులుగా వెలిగిపోతున్నారు. వయసు పెరుగుతున్నా జోరు మాత్రం తగ్గడం లేదు. ఎన్నో సూపర్ హిట్ మూవీల్లో నటించిన ఐశ్వర్యారాయ్ ఆ తర్వాత అభిషేక్ బచ్చన్‌ను పెళ్లి చేసుకుని ఓ బిడ్డకు తల్లయింది. ఆ తర్వాత కూడా పలు సినిమాల్లో నటించింది. గత సినిమా పొన్నియన్ సెల్వన్‌లో నటించి తన ప్రతిభను మరోసారి చూపించింది. రణ్‌బీర్‌ కపూర్, అలియా జంట 2022లో ఓ పాపకు జన్మనిచ్చారు. ఆ తర్వాత కూడా ఈ బామ వరుస సినిమాల్లో నటిస్తోంది.
రాకీ అవుర్ రాణీ కీ ప్రేమ్‌ కహనీ మూవీలో యూత్‌కు నచ్చేలా కనిపించింది. హార్ట్ ఆఫ్ స్టోన్ ఇంగ్లీష్ మూవీలోనూ నటించింది. మరికొన్ని సినిమాలకు సైన్ చేసింది. వెండితెరపై జంటగా నటించిన కరీనా కపూర్, సైఫ్ అలీఖాన్ నిజ జీవితంలోనూ జంటగా మారారు. కరీనా మదర్‌గా బాధ్యతలు నిర్వహిస్తూనే సినిమాలలో నటిస్తోంది. ఈ ఏడాది క్రూ మూవీతో ఓ విజయాన్ని ఖాతాలో వేసుకుంది. బాలీవుడ్‌లో మరికొందరు అందమైన హీరోయిన్లు కూడా నటనను కంటిన్యూ చేస్తున్నారు.
వరుసగా సినిమాలు చేసుకుంటూ సక్సెస్‌ఫుల్ తారలుగా దూసుకుపోతున్నారు. కెరీర్‌కు కూడా ప్రాధాన్యత ఇస్తున్నారు. ప్రియాంక చోప్రా, నిక్ జానస్‌ దంపతులు సరోగసీ పద్ధతి ద్వారా పండంటి బిడ్డకు జన్మనిచ్చారు. బాలీవుడ్‌లో హీరోయిన్‌గా సత్తా చూపించిన ప్రియాంక జోరు ఇప్పటికీ ఏమాత్రం తగ్గలేదు. ప్రియాంక చోప్రా బిజీ తారల లిస్ట్‌లో ఉంది. నెంబర్‌ వన్ తారగా దూసుకెళ్లిన ఈ బ్యూటీ హాలీవుడ్ మూవీస్‌లోనూ నటించింది. ప్రస్తుతం హిందీ సినిమాల కంటే ఇంగ్లీష్ సినిమాల్లోనే ఎక్కువగా నటిస్తోంది.
