టాలీవుడ్ స్టార్ హీరో ఎన్టీఆర్ భార్య ల‌క్ష్మీ ప్ర‌ణ‌తి తమ్ముడు నార్నే నితిన్ హీరోగా రెండో సినిమా లాంఛ‌నంగా ప్రారంభ‌మైంది. ఆస‌క్తిక‌ర‌మైన విష‌య‌మేమంటే ఈ సినిమా గీతా ఆర్ట్స్ అనుబంధం సంస్థ జీఏ2 పిక్చ‌ర్స్ బ్యాన‌ర్‌లో రూపొంద‌నుంది. ప్ర‌ముఖ నిర్మాత అల్లు అర‌వింద్ స‌మ‌ర్ప‌ణ‌లో బ‌న్నీ వాస్, విద్యా కొప్పినీడి ఈ సినిమాను నిర్మిస్తున్నారు. ఈ సినిమాకు సంబంధించిన పూజా కార్య‌క్ర‌మాలు లాంఛ‌నంగా గురువారం ప్రారంభ‌మ‌య్యాయి.
ముహూర్త‌పు స‌న్నివేశానికి అల్లు అర‌వింద్ క్లాప్ కొట్ట‌గా స్టార్ ప్రొడ్యూస‌ర్ దిల్ రాజు కెమెరా స్విచ్ ఆన్ చేశారు. టాలెంటెడ్ డైరెక్ట‌ర్ చందు మొండేటి గౌర‌వ ద‌ర్శ‌క‌త్వం వ‌హించారు. డైరెక్ట‌ర్ మారుతి స్క్రిప్ట్‌ను మేక‌ర్స్‌కు అందించారు. బ‌న్నీ వాస్, విద్యా కొప్పినీడి నిర్మాత‌లుగా ప్ర‌తిష్టాత్మ‌కంగా రూపొందనున్న ఈ సినిమాలో ప్ర‌ముఖ న‌టీన‌టులు, సాంకేతిక నిపుణులు వ‌ర్క్ చేయ‌బోతున్నారు.
అంజిబాబు కంచిప‌ల్లి ద‌ర్శ‌కుడిగా ప‌రిచ‌యం అవుతున్నారు. కిర‌ణ్ కుమార్ మ‌న్నె ఆర్ట్ డైరెక్ట‌ర్‌గా ప‌నిచేస్తున్న ఈ చిత్రానికి స‌మీర్ క‌ళ్యాణి సినిమాటోగ్ర‌ఫీ అందిస్తుండ‌గా రామ్ మిర్యాల సంగీతాన్ని స‌మ‌కూరుస్తున్నారు. త్వ‌ర‌లోనే మ‌రిన్ని వివ‌రాల‌ను తెలియ‌జేస్తామ‌ని మేక‌ర్స్ తెలియ‌జేశారు.నార్నే నితిన్ మొద‌టి చిత్రానికి ద‌ర్శ‌కుడు స‌తీష్ వేగేశ్న. శ్రీశ్రీరాజావారు పేరుతో తెర‌కెక్కిన ఈ సినిమా ఇటీవలే షూటింగ్‌ పూర్తి చేసుకుంది. ప్రస్తుతం నిర్మాణానంత‌ర కార్య‌క్ర‌మాల‌ను పూర్తి చేసుకుంటోంది.
