యంగ్‌ రెబల్‌స్టార్‌ ప్రభాస్‌కు ‘బాహుబలి’ కంటే ముందే ‘సాహో’ కథ చెప్పానని డైరెక్టర్‌ సుజీత్‌ తెలిపారు. ఆయన తెరకెక్కిస్తున్న ఈ సినిమా ఆగస్టు 30న విడుదల కాబోతోంది. యూవీ క్రియేషన్స్‌ సంస్థ భారీ స్థాయిలో నిర్మిస్తున్న ఈ సినిమా ప్రచార చిత్రాలు అంచనాల్ని పెంచేశాయి. తాజాగా ‘సాహో’ గురించి సుజీత్‌ మీడియాతో పంచుకున్నారు. సినిమా అందర్నీ ఆకట్టుకుంటుందని చెప్పారు.
‘ప్రభాస్‌ని హీరోగా ఎవరూ ఎంచుకోలేరు. ఆయన దర్శకుడ్ని ఎంచుకోవాల్సిందే. ‘సాహో’ కథ నచ్చడం వల్లే నా డైరెక్షన్‌లో నటిస్తున్నారు అనుకుంటున్నా. ఆయనంటే నాకు చాలా ఇష్టం. దానికి తగ్గట్టే కథ సిద్ధం చేశా. దర్శకుడిగా అనేక సవాళ్లు ఎదుర్కొన్నా. ప్రతీ పాట ప్రత్యేకంగా ఉండాలనుకున్నాం. చిత్ర బృందం మొత్తం చాలా కష్టపడ్డాం. ‘బాహుబలి’ కంటే ముందే ప్రభాస్‌కు ‘సాహో’ కథ చెప్పా. ‘బాహుబలి’ వల్ల ఈ సినిమా కథలో ఎలాంటి మార్పులు చేయలేదు’ అని ఆయన చెప్పారు. ‘రన్ రాజా రన్’ సినిమాతో సుజీత్‌ దర్శకుడిగా గుర్తింపు పొందిన సంగతి తెలిసిందే.
‘సాహో’ చిత్రంలో శ్రద్ధా కపూర్‌ హీరోయిన్‌గా నటిస్తున్నారు. నీల్‌ నితిన్‌ ముకేష్‌, వెన్నెల కిశోర్‌, మురళీ శర్మ, జాకీ ష్రాఫ్‌, అరుణ్‌ విజయ్‌, మందిరా బేడీ, చుంకీ పాండే తదితరులు కీలక పాత్రలు పోషిస్తున్నారు. దాదాపు రూ.300 కోట్ల బడ్జెట్‌తో రూపొందిస్తున్న చిత్రమిది. తెలుగు, హిందీ, తమిళ భాషల్లో సినిమా విడుదల కాబోతోంది. బహుబలి తరువాత ప్రభాస్‌ నటిస్తున్న చిత్రం కావడంతో ఈ మూవీ పై భారీ అంచనాలు ఉన్నాయి.
