తమిళ స్టార్‌ హీరో చియాన్‌ విక్రమ్‌ ఇటీవల స్వల్ప అస్వస్థతకు గురైన సంగతి తెలిసిందే. గత శుక్రవారం ఆయనకు ఛాతిలో అసౌకర్యంగా అనిపించడంతో చికిత్స నిమిత్తం ఆయన చెన్నైలోని కావేరి ఆస్పత్రిలో చేరారు. అక్కడ రెండు రోజుల పాటు ఐసీయూలో చికిత్స తీసుకున్న ఆయన శనివారం డిశ్చార్జి అయ్యారు. ప్రస్తుతం విక్రమ్‌ ఆరోగ్యం నిలకడ ఉంది.
ఈ క్రమంలో.. నిన్న(జూలై 11న) జరిగిన కోబ్రా మూవీ ఆడియో లాంచ్‌ ఈవెంట్‌లో విక్రమ్‌ పాల్గొన్నారు. ఈ సందర్భంగా ఆయన మాట్లాడుతూ.. తన ఆరోగ్యంపై వచ్చిన పుకార్లపై స్పందించాడు. స్టేజ్‌పై మాట్లాడుతుండగా విక్రమ్‌ తన చాతిపై చేయి వేసుకున్నాడు. దీంతో ‘నాకు తెలియకుండానే చాతిపై చేయి వేసుకున్నాను. దీన్ని కూడా గుండెపోటు అంటారేమో’ అంటూ ఫన్నీ కామెంట్స్‌ చేశాడు. అనంతరం తాజాగా తన ఆరోగ్యంపై వచ్చిన వార్తలన్ని పుకార్లే అని అన్నారు. ప్రస్తుతం తాను పూర్తి ఆరోగ్యంగా ఉన్నానని.. తనకు వచ్చింది గుండెపోటు కాదని స్పష్టం చేసేందుకే కోబ్రా ఆడియో లాంచ్‌కు వచ్చానని విక్రమ్‌ చెప్పారు. అంతేకాక కాస్తా అస్వస్థతగా అనిపించడంతో హాస్పిటల్‌కు వెళ్లానన్నారు. ఇక తనపై చూపించిన ప్రేమకు అభిమానులకు ధన్యవాదాలు తెలిపాడు విక్రమ్‌. కాగా విక్రమ్‌ హీరోగా అజయ్‌ జ్ఞానముత్తు యాక్షన్‌ ఎంటర్‌టైనర్‌గా కోబ్రాను తెరకెక్కించారు. ఈ మూవీ ఆగస్ట్‌ 11న విడుదల కానుంది. ఈ చిత్రాన్ని తెలుగు, తమిళం, హిందీ భాషల్లో రిలీజ్‌ చేస్తున్నారు. ఈ సినిమాలో ‘కేజీయఫ్‌’ బ్యూటీ శ్రీనిధి శెట్టి హీరోయిన్‌గా నటించగా.. భారత మాజీ క్రికెటర్‌ ఇర్ఫాన్‌ పఠాన్‌ విలన్‌గా కనిపించనున్నాడు.
