రితేశ్ రానా దర్శకత్వంలో కీరవాణి రెండో కుమారుడు శ్రీ సింహా కథానాయకుడిగా తెరకెక్కిన సస్పెన్స్‌ థ్రిల్లర్‌ మూవీ ‘మత్తువదలరా’ ఇటీవలే ప్రేక్షకుల ముందుకు వచ్చింది. ఈ సినిమాలో సింహా నటన బాగుందని కాలభైరవ అందించిన సంగీతం చాలా అద్భుతంగా ఉందని పలువురు సినీ ప్రముఖులు ప్రశంసలు అందించారు. తాజాగా ‘మత్తువదలరా’ చిత్రబృందాన్ని టాలీవుడ్‌ కథానాయకుడు రానా దగ్గుబాటి ప్రశంసించారు. ఈ మేరకు ఆయన చిత్రబృందాన్ని ప్రశంసిస్తూ ఓ వీడియోను చిత్ర నిర్మాణ సంస్థ మైత్రీ మూవీ మేకర్స్‌ ట్విటర్‌ వేదికగా షేర్‌ చేశారు.
”మత్తువదలరా’ సినిమా చూశాను. సస్పెన్స్‌ చిత్రాలంటే నాకు చాలా ఇష్టం. ఈ సినిమా నాకు ఎంతగానో నచ్చింది. ఇలాంటి మంచి సస్పెన్స్‌ చిత్రాన్ని అందించిన డైరెక్టర్‌ రితేశ్ రానాకు అభినందనలు. సన్నివేశాలకు అనుగుణంగా కాలభైరవ అందించిన సంగీతం చాలా అద్భుతంగా ఉంది. ఈ సినిమా చూశాక నటుడిగా సింహా ఎదిగాడనిపించింది. సింహా నాకు చిన్నప్పటి నుంచి తెలుసు. తన నటన చాలా బాగుంది. నిర్మాతలకు కంగ్రాట్స్‌. మీరు కూడా ఈ సినిమాను థియేటర్లకు వెళ్లి చూడండి. ఎంజాయ్‌ చేయండి. తెలుగులో ఇలాంటి చిత్రాలు మరిన్ని రావాలని కోరుకుంటున్నాను.’ అని రానా పేర్కొన్నారు.
