పవర్‌స్టార్‌ పవన్‌ కళ్యాణ్‌ అభిమానులకు మరో స్పెషల్‌ సర్‌ప్రైజ్‌ వచ్చేసింది. ఆయన హీరోగా నటిస్తున్న ‘హరిహర వీరమల్లు’ సినిమా నుంచి పుట్టినరోజు కానుక విడుదలైంది. పవన్‌ 50వ పుట్టినరోజుని పురస్కరించుకుని గురువారం మధ్యాహ్నం చిత్రబృందం ఈ అప్డేట్‌ ఇచ్చింది. ‘హరిహర వీరమల్లు’ విడుదల తేదీని ప్రకటించింది. ఈ మేరకు వచ్చే ఏడాది వేసవి కానుకగా ఏప్రిల్‌ 29న ఈ సినిమా ప్రేక్షకుల ముందుకు రానుంది. పీరియాడికల్‌ డ్రామాగా తెరకెక్కుతోన్న ఈ సినిమాకి క్రిష్‌ దర్శకత్వం వహిస్తున్నారు.
ఇందులో పవన్‌ వజ్రాలదొంగ పాత్రలో కనిపించనున్నట్లు సమాచారం. ఈ సినిమాలో నిధి అగర్వాల్‌ హీరోయిన్‌గా నటించింది. మొఘల్‌ సామ్రాజ్యం పాలన బ్యాక్‌డ్రాప్‌లో రూపుదిద్దుకోనున్న ఈ సినిమాలో ఔరంగజేబు చెల్లెలి పాత్రలో బాలీవుడ్‌ నటి జాక్వెలిన్‌ ఫెర్నాండెజ్‌ కనిపించనున్నారు. అలాగే, ఔరంగజేబు పాత్రలో అర్జున్‌ రాంపాల్‌ నటించే అవకాశం ఉన్నట్లు తెలుస్తోంది. కీరవాణి ఈ సినిమాకి సంగీతం అందిస్తున్నారు. మెగా సూర్య ప్రొడెక్షన్స్‌ పతాకంపై ఈ సినిమా నిర్మితమవుతోంది. మరోవైపు ఇప్పటికే విడుదలైన ‘భీమ్లానాయక్‌’ ఫస్ట్‌ సింగిల్‌ విశేషంగా అలరిస్తోన్న విషయం తెలిసిందే.
