Game Changer Review:
సంక్రాంతి బరిలో భారీ అంచనాలతో వచ్చిన “Game Changer” సినిమాపై అందరికీ ఆసక్తి ఎక్కువగా ఉంది. శంకర్ – రామ్ చరణ్ కాంబినేషన్‌ కావడం, దిల్ రాజు 50వ ప్రాజెక్ట్ కావడం, అన్నీ భారీ ఎక్స్‌పెక్టేషన్లను పెంచాయి. అయితే, సినిమా ఈ అంచనాలను అందుకుందా? శంకర్ మార్క్ మిస్సయ్యిందా? అసలు కథ ఏంటో చూద్దాం.
కథ:
రామ్ నందన్ (రామ్ చరణ్) ఓ నిజాయితీగల కలెక్టర్. బొబ్బిలి సత్యమూర్తి (శ్రీకాంత్) నేతృత్వంలోని ప్రభుత్వానికి అతను పనిచేస్తుంటాడు. అయితే సత్యమూర్తి కొడుకు మోపిదేవి (ఎస్.జె. సూర్య) ముఖ్యమంత్రి పదవి కోసం తహతహలాడుతుంటాడు. రామ్ నందన్ మోపిదేవి అక్రమాలకు అడ్డుకట్ట వేయడానికి ప్రయత్నిస్తాడు. ఇంతలో సత్యమూర్తి అకస్మాత్తుగా మరణిస్తాడు. అసలు రామ్ నందన్ గతం ఏమిటి? అతనికి సత్యమూర్తితో ఉన్న సంబంధం ఏంటి? ఈ ప్రశ్నలు మిగతా కథని ముందుకు నడిపిస్తాయి.
నటీనటులు:
రామ్ చరణ్ తన క్యారెక్టర్‌లో కొత్తగా కనిపించాడు. ముఖ్యంగా ఫ్లాష్‌బ్యాక్‌లో ‘అప్పన్న’ పాత్రలో రామ్ చరణ్ నటన బాగా ఆకట్టుకుంది. తన రఫ్ లుక్, డైలాగ్ డెలివరీ “రంగస్థలం” నాటి ఫీలింగ్‌ని తెచ్చిపెట్టాయి. ఎస్.జె. సూర్య తన క్యారెక్టర్‌లో హై ఎనర్జీ చూపించాడు కానీ కొన్నిసార్లు అతిగా అనిపిస్తుంది. కియారా అద్వాని పాత్ర చాలా సింపుల్‌గా ఉండగా, అంజలి పాత్రలో చిన్న ట్విస్ట్ ఉంది కానీ అంతగా ఉపయోగించలేదు. శ్రీకాంత్ చాలా ఫ్రెష్‌గా కనిపించి తన రోల్‌ని బాగా చేసాడు.
సాంకేతిక అంశాలు:
దిల్ రాజు ఈ సినిమాను చాలా గ్రాండ్‌గా నిర్మించాడు. తమన్ బ్యాక్‌గ్రౌండ్ మ్యూజిక్ పలు సీన్లలో బాగుంది కానీ కొన్ని చోట్ల అతిగా అనిపిస్తుంది. ఓవర్సీన్ ఫైట్ సీక్వెన్సెస్, ప్రి-క్లైమాక్స్, క్లైమాక్స్ ఫైట్ మాత్రం సినిమాకు పెద్ద మైనస్ పాయింట్స్ అయ్యాయి. సాయి మాధవ్ బుర్రా డైలాగ్స్ కొన్ని బాగున్నా, కామెడీ ట్రాక్ చాలా సన్నగిల్లింది.
ప్లస్ పాయింట్స్:
*రామ్ చరణ్ నటన
*ఫ్లాష్‌బ్యాక్‌లో అప్పన్న పాత్ర
*దిల్ రాజు గ్రాండ్ ప్రొడక్షన్
*సెకండ్ హాఫ్ సీన్లు
మైనస్ పాయింట్స్:
-రొటీన్ కథనం
-పాత స్టోరీటెల్లింగ్ టెక్నిక్స్
-బలహీనమైన క్లైమాక్స్
-కియారా పాత్రకు ప్రాముఖ్యత లేకపోవడం
తీర్పు:
“గేమ్ చేంజర్” సినిమాకు భారీ అంచనాలు ఉన్నా, అవి అందుకోలేకపోయింది. శంకర్ నుంచి ప్రేక్షకులు కొత్తదనం ఆశిస్తారు. కానీ ఈ సినిమా శంకర్ మార్క్ ఫిల్మ్ అనిపించలేకపోయింది. రామ్ చరణ్ నటన, కొన్ని సీన్లు మాత్రమే సినిమాను కాస్త ఆదుకున్నాయి. పండగ సీజన్ కావడంతో మరో సినిమాల రిజల్ట్ ఆధారంగా ఈ సినిమా విజయం ఆధారపడి ఉంటుంది.
రేటింగ్: 2.5/5
