కన్నడ నటి, కాంగ్రెస్ పార్టీ నాయకురాలు, మాజీ ఎంపీ రమ్య అలియాస్ దివ్య స్పందన మృతిచెందారంటూ ఒక వార్త సోషల్ మీడియాలో వైరల్ అయ్యింది. తమిళనాడులో కొన్ని టీవీ ఛానెళ్లు సైతం రమ్య చనిపోయారంటూ వార్తలు వేసేశారు. గుండెపోటుతో 40 ఏళ్ల రమ్య ఆకస్మిక మృతి చెందారని రాసుకొచ్చారు. ఇక చాలా మంది ట్విట్టర్ వేదికగా రమ్య మృతికి సంతాపాలు కూడా తెలియజేశారు. కానీ, బతికున్న మనిషిని చంపేసి సంతాపాలు తెలియజేయడం దురదృష్టకరం.
బతికున్న, ఆరోగ్యంగా ఉన్న సినీ నటులు కొంతమంది కన్నుమూశారంటూ గతంలో చాలా తప్పుడు వార్తలు సోషల్ మీడియాలో సర్క్యులేట్ అవ్వడం మనం చూశాం. ఇది కూడా అలాంటి వార్తే. ఒక ప్రముఖ పీఆర్ఓ ఈ వార్తను ముందుగా సోషల్ మీడియాలో పోస్ట్ చేశారట. దీంతో ఈ వార్త వైరల్ అయ్యింది. అయితే, ఆయన తన తప్పును గ్రహించిన సదరు పీఆర్ఓ తన పోస్ట్‌ను డిలీట్ చేసేశారు. కానీ, అప్పటికే వార్త బాగా వైరల్ అయిపోయింది. దీంతో రమ్య కుటుంబ సభ్యులు స్పందించారు. ఆమె బాగానే ఉన్నారని.. ప్రస్తుతం స్విట్జర్లాండ్‌లోని జెనీవాలో ఆమె ఉన్నారని స్పష్టం చేశారు.
ఈమె తెలుగులో నందమూరి కళ్యాణ్ రామ్ హీరోగా వచ్చిన ‘అభిమన్యు’ సినిమాతో పరిచయమయ్యారు. ఆమె తెలుగులో చేసిన సినిమా ఇదొక్కటే. ఆ తరవాత మళ్లీ ‘సూర్య సన్ ఆఫ్ కృష్ణన్’ సినిమాతో తెలుగు ప్రేక్షకులను పలకరించారు. అయితే, ఇది తమిళ డబ్బింగ్ సినిమా. ఆ తరవాత కన్నడ, తమిళ్‌లో వరుస సినిమాలు చేశారు. ఇటీవల తెలుగులోకి అనువాదమైన ‘బాయ్స్ హాస్టల్’ కన్నడ వెర్షన్‌లో రమ్య అతిథి పాత్రలో మెరిశారు.
