దుల్కర్ సల్మాన్ హీరోగా హను రాఘవపూడి దర్శకత్వంలో తెరకెక్కిన విభిన్న ప్రేమకథా చిత్రం ‘సీతా రామం’. యుద్ధంతో రాసిన ప్రేమకథ ట్యాగ్ లైన్. మృణాల్ ఠాకూర్ కథానాయిక. ఈ చిత్రాన్ని అశ్వనీదత్ – స్వప్న కలిసి నిర్మించారు. కశ్మీర్ ప్రాంతంలో పనిచేసే సిపాయిగా ఈ సినిమాలో దుల్కర్ కనిపించనున్నాడు. దాదాపు షూటింగ్ పూర్తిచేసుకున్న ఈ సినిమాకు సంబంధించి టీజర్‌ను రిలీజ్ చేశారు చిత్రబృందం.
తనకు ఎవరూ లేరంటూ ఒంటరితనంతో బాధపడుతున్న యువకుడికి నీ భార్య సీతామహాలక్ష్మిని అంటూ ఒక యువతి నుంచి ఉత్తరం వస్తుంది. ఆ ఉత్తరం ఎవరు రాశారనేది అతనికి తెలియదు. సీత ఎవరనేది తెలియదు. అప్పుడు అతను ఏం చేశాడనేదే కథ అనే విషయం టీజర్ ద్వారా తెలుస్తోంది. 1965 కాలం నాటి కథతో దర్శకుడు ఈ చిత్రాన్ని తెరకెక్కిస్తున్నాడు. రష్మిక, సుమంత్ కీలక పాత్రలు పోషిస్తున్నారు. ఆగస్ట్ 5న తెలుగుతో పాటు ఇతర భాషల్లో ఈ సినిమాను విడుదల చేస్తున్నారు. ఈ సినిమాకు విశాల్ చంద్రశేఖర్ సంగీతాన్ని అందించాడు.
