Tharun Bhascker New movie:
విజయ్ దేవరకొండ హీరోగా నటించిన పెళ్లిచూపులు అనే సినిమాతో.. యంగ్ డైరెక్టర్ తరుణ్ భాస్కర్ ఇండస్ట్రీకి పరిచయం అయ్యారు. ఈ నగరానికి ఏమైంది సినిమాతో బ్లాక్ బస్టర్ అందుకున్న తరుణ్ భాస్కర్.. విజయ్ దేవరకొండ నిర్మాణంలో.. మీకు మాత్రమే చెప్తా అనే సినిమాతో హీరోగా కూడా పరిచయం అయ్యారు.
ఒకవైపు దర్శకుడిగా మాత్రమే కాక మరొకవైపు నటుడిగా కూడా కెరియర్లో ముందుకు దూసుకు వెళుతున్నారు తరుణ్ భాస్కర్. తాజాగా తరుణ్ భాస్కర్ హీరోగా నటిస్తున్న ఒక సినిమా త్వరలో ప్రేక్షకుల ముందుకి రాబోతోంది.
డైరెక్టర్ వేణు ఉడుగుల ఈ సినిమాతో నిర్మాతగా కూడా తన అదృష్టాన్ని పరీక్షించుకోనున్నారు. యారో సినిమాస్ బ్యానర్ పై బోనం జగన్ మోహన్ రెడ్డి ఈ సినిమాకి సహా నిర్మాతగా వ్యవహరిస్తున్నారు. వంశీ రెడ్డి దొండపాటి ఈ సినిమాతో దర్శకుడిగా పరిచయం కాబోతున్నారు. తరుణ్ భాస్కర్ ఈ సినిమాలో హీరోగా కనిపించనున్నారు.
తాజా సమాచారం ప్రకారం తరుణ్ భాస్కర్ తప్ప సినిమా కోసం చాలామంది కొత్త నటీనటులను ఎంపిక చేసుకోబోతున్నట్లు వార్తలు వినిపిస్తున్నాయి. ఈ నేపథ్యంలోనే చిత్ర బృందం క్యాస్టింగ్ కాల్ ను కూడా ప్రకటించింది. ఇడుపు కాయితం అంటూ ఒక ప్రామిసరీ నోట్ మీద.. శ్రీనివాస్ గౌడ్ కి, శ్రీలత కి ఇడుపు కాయితం పంచాయితీ జరుగుతున్నట్టు ఉంది.
ఇడుపు కాయితం అంటే డివోర్స్ నోటీస్ అని అర్థం వస్తుంది. ఈ పంచాయతీలో పెద్దలుగా, కుటుంబ సభ్యులుగా కనిపించడానికి నటీనటులు కావాలట. ఆసక్తి ఉన్నవాళ్లు సంప్రదించమని ఆ నోట్ మీద క్యాస్టింగ్ కాల్ ప్రకటించింది ఈ చిత్ర బృందం. క్యాస్టింగ్ కాల్ తో పాటు సినిమాకి ప్రమోషన్ కూడా అయిపోయినట్లు చెప్పుకోవచ్చు.
ఇక ఈ సినిమా కథ కూడా భార్యాభర్తల మధ్య ఉండే గొడవలు, పల్లెటూరి నేపథ్యంలో జరిగే పంచాయితీలు బ్యాక్ డ్రాప్ లో సాగే అవకాశం ఉంది.
