కోలీవుడ్‌ స్టార్‌ హీరో ధనుష్ వరుస సినిమాలతో బిజీగా ఉన్నాడు. ఆయనకు టాలీవుడ్‌లోనూ మంచి క్రేజ్‌ ఉంది. ఇటీవల ‘మారన్’తో పర్వాలేదనిపించిన ధనుష్.. హాలీవుడ్‌ మూవీ ‘ది గ్రే మ్యాన్’ సినిమాలో నటిస్తున్న విషయం తెలిసిందే. ఇటీవల ఈ సినిమా నుంచి విడుదలైన ధనుష్ ఫస్ట్‌ లుక్‌, ట్రైలర్‌కు మంచి స్పందన వచ్చింది. ఈ సినిమాలో నెగెటివ్‌ పాత్రలో కనిపిస్తున్నట్లు సమాచారం. ప్రముఖ హాలీవుడ్‌ డైరెక్టర్లు రూసో బ్రదర్స్‌ (జో రూసో-ఆంటోనీ రూసో) దర్శకత్వం వహించారు. అయితే వీరిద్దరూ త్వరలో ఇండియాకు రానున్నారు. అది కూడా ధనుష్ కోసం భారత్‌కు వస్తున్నట్లు వాళ్లు తెలిపారు.
ఓటీటీ దిగ్గజం నెట్‌ఫ్లిక్స్‌ రూపొందించిన ఈ మూవీ తెలుగు, తమిళం, కన్నడ, హిందీ, మలయాళ భాషల్లోనూ విడుదల కానుంది. ఈ సందర్భంగా ఏర్పాటు చేసిన ఓ ప్రెస్‌ మీట్‌లో ఇండియాకు వస్తున్నట్లు రూసో బ్రదర్స్‌ తెలిపారు. ”మేం తెరకెక్కించిన కొత్త సినిమా ‘ది గ్రే మ్యాన్’ వీక్షించేందుకు, మా స్నేహితుడు ధనుష్‌ను చూసేందుకు ఇండియాకు వస్తుండటం మాకు ఎంతో సంతోషంగా ఉంది. త్వరలో కలుద్దాం” అని తెలిపారు.
