Shankar mistake in Game Changer:
కొవిడ్ తర్వాత సినిమా ఖర్చులు భారీగా పెరిగిపోయాయి. అందువల్ల చాలా మంది నిర్మాతలు కొత్త సినిమాలు చేయడంలో సంకోచిస్తున్నారు. పెద్ద సినిమాలు తీయడానికి ఖర్చు పెరుగుతున్నప్పటికీ, ఆఖరికి ఫలితం ఆశించినంతగా రావడం లేదు. తాజాగా “గేమ్ చేంజర్” సినిమా కూడా ఈ జాబితాలో చేరింది.
వాల్తేర్ వీరయ్య ప్రమోషన్ల సమయంలో చిరంజీవి చెప్పిన మాటలు ఇప్పుడు చర్చకు వస్తున్నాయి. చిరు మాట్లాడుతూ, “సెట్స్ మీద ఎక్కువ ఖర్చులు చేయడం, యాక్టర్స్ టైమ్ వృధా చేయడం మానుకోవాలి. అందుకు ముందుగానే ప్రీ ప్రొడక్షన్ పనులు పూర్తి చేయాలి. పాత్రల కోసం వర్క్‌షాపులు పెట్టాలి. కెమెరా యాంగిల్స్ కూడా ముందే ఫిక్స్ చేసుకోవాలి” అని అన్నారు.
కానీ “గేమ్ చేంజర్” చిత్రానికి ఈ సూచనలు పాటించలేదు. దర్శకుడు శంకర్ ఇటీవల సినిమా ఫైనల్ అవుట్‌పుట్‌పై అసంతృప్తి వ్యక్తం చేశాడు. మొదట ఈ సినిమా రన్‌టైమ్ 5 గంటలుగా వచ్చిందని, దానిని కట్ చేయాల్సి వచ్చిందని చెప్పాడు. చాలా మంచి సన్నివేశాలు కూడా కత్తిరించాల్సి రావడం తనకు బాధ కలిగించిందని పేర్కొన్నారు.
ఇది శంకర్‌కు కొత్త విషయమేమీ కాదు. ఆయన గతంలో తీసిన “ఐ”, “2.0”, “ఇండియన్ 2” సినిమాలూ ఇలాగే ప్రాబ్లమ్‌లతో వచ్చాయి. అవి కూడా ఎక్కువ రన్‌టైమ్ కారణంగా చాలా సీన్స్ ట్రిమ్ చేయాల్సి వచ్చింది.
ప్రీ ప్రొడక్షన్ పనులు తక్కువ చేయడం వల్ల సినిమాలు షూటింగ్ సమయంలో చాలా సార్లు రీషూట్‌లు అవసరమవుతాయి. దీని వల్ల ఖర్చులు పెరిగిపోతాయి. నేటి ఫిల్మ్ మేకర్స్‌కు ఇది పాఠంగా మారాలి. ఒకసారి ప్రీ ప్రొడక్షన్ పనులు పూర్తిగా ప్లాన్ చేస్తే, సినిమా టైమ్‌కు పూర్తవుతుంది. అప్పుడు ఆర్ధిక నష్టం తప్పించుకోవచ్చు.
