కోలీవుడ్‌ స్టార్‌ హీరో ధనుష్ కి.. తెలుగులోనూ మంచి ఫాలోయింగ్‌ ఉంది. ఇటీవల ‘మారన్’తో అలరించిన ధనుష్.. హాలీవుడ్‌ మూవీ ‘ది గ్రే మ్యాన్’ సినిమాలో నటిస్తున్న విషయం తెలిసిందే. ఇటీవల ఈ సినిమా నుంచి ధనుష్ ఫస్ట్‌ లుక్‌ విడుదల కాగా మంచి రెస్పాన్స్‌ వచ్చింది. తాజాగా ఈ మూవీ ట్రైలర్‌ను విడుదల చేశారు మేకర్స్‌. ఆద్యంతం యాక్షన్‌ సీన్స్‌తో ట్రైలర్ ఆకట్టుకుంది. ఇందులో ధనుష్ నెగెటివ్‌ పాత్రలో కనిపించనున్నాడని వినికిడి.
మార్క్‌ గ్రేనీ నవల ‘ది గ్రే మ్యాన్’ ఆధారంగా ఈ మూవీని తెరకెక్కించారు. ఈ సినిమాకు రూసో బ్రదర్స్‌ (జో రూసో-ఆంటోనీ రూసో) దర్శకత్వం వహించారు. వీరు బాక్సాఫీసును షేక్‌ చేసిన ‘అవెంజర్స్‌: ఇన్ఫినిటీ వార్‌’, ‘అవెంజర్స్‌: ఎండ్‌గేమ్‌’ వంటి సినిమాలను డైరెక్ట్‌ చేశారు. ఇందులో ర్యాన్‌ గోస్లింగ్, క్రిస్‌ ఎవాన్స్, అనా డి అర్మాస్‌ ప్రధాన పాత్రల్లో నటించారు. ఈ మూవీ జూలై 15న థియేటర్లలో, జూలై 22న ఓటీటీ దిగ్గజం నెట్‌ఫ్లిక్స్‌లో విడుదల కానుంది. కాగా ధనుష్‌కు ఇది రెండో ఇంటర్నేషనల్‌ సినిమా. ఇదివరకు ‘ది ఎక్స్‌ట్రార్డినరీ జర్నీ ఆఫ్ ది ఫకీర్’ సినిమాతో హాలీవుడ్‌కు పరిచయం అయ్యాడు.
