జూనియర్‌ ఎన్టీఆర్ హీరోగా నటిస్తున్న తాజా చిత్రం ‘దేవర’. కొరటాల శివ డైరెక్షన్‌లో వస్తున్న ఈ సినిమాలో బాలీవుడ్ నటుడు సైఫ్ అలీ ఖాన్‌ విలన్‌గా నటిస్తున్నాడు. బాలీవుడ్ బ్యూటీ శ్రీదేవి కూతురు జాన్వీ కపూర్‌ ఈ సినిమాతో హీరోయిన్‌గా టాలీవుడ్‌లో ఎంట్రీ ఇస్తుంది. ఇప్పటికే విడుదలైన హీరో, హీరోయిన్, విలన్ ఫస్ట్ లుక్ పోస్టర్లు ఆకట్టుకున్నాయి. ప్రస్తుతం ఈ సినిమా షూటింగ్ హైదరాబాద్‌లో శరవేగంగా జరుగుతోంది. ఎక్కువ శాతం ఇండోర్ షూటింగే చేస్తున్నారు. కంప్యూటర్ గ్రాఫిక్స్ ఆధారంగా రూపొందుతోన్న ఈ సినిమా చిత్రీకరణ కోసం హైదరాబాద్ శివారులో భారీ సెట్స్ వేశారు. అక్కడే షూటింగ్ చేస్తున్నారు.
ఈ క్రమంలో ఈ సినిమా బిజినెస్ గురించి ఇప్పటి నుంచే చర్చలు మొదలైపోయాయి. ఈ సినిమా ఓటీటీ హక్కులను విక్రయించారని తాజాగా టాలీవుడ్‌ టాక్. అది కూడా భారీ ధరకు విక్రయించారట. దిగ్గజ ఓటీటీ సంస్థ నెట్‌ఫ్లిక్స్ ఏకంగా రూ.40 కోట్లకు ‘దేవర’ స్ట్రీమింగ్ రైట్స్ కొనుగోలు చేసిందని ప్రచారం జరుగుతోంది. ఈ సినిమా హక్కుల కోసం అమెజాన్ ప్రైమ్ వీడియో కూడా పోటీ పడిందట. కానీ, నెట్‌ఫ్లిక్స్ అధిక ధరకు దక్కించుకుందని అంటున్నారు.
నందమూరి కళ్యాణ్ రామ్ సమర్పణలో నందమూరి తారక రామారావు ఆర్ట్స్, యువసుధ ఆర్ట్స్ బ్యానర్లపై సుధాకర్ మిక్కిలినేని, కొసరాజు హరికృష్ణ ఈ సినిమాను నిర్మిస్తున్నారు. రత్నవేలు సినిమాటోగ్రఫీ అందిస్తున్నారు. సాబు సిరిల్ ప్రొడక్షన్ డిజైనర్. శ్రీకర్ ప్రసాద్ ఎడిటింగ్ బాధ్యతలు చూసుకుంటున్నారు. టి.యుగంధర్ వీఎఫ్ఎక్స్ సూపర్ వైజర్. ఇక ప్రస్తుత సంగీత సంచలనం అనిరుధ్.. ఈ సినిమాకు మ్యూజిక్ కంపోజ్ చేస్తున్నారు.
