17 సంవత్సరాల క్రితం విడుదలైన ‘చంద్రముఖి’ సినిమా ఎంతటి హిట్‌ అయిందో తెలిసిందే. మళ్లీ ఇప్పుడు రాఘవ లారెన్స్ హీరోగా బాలీవుడ్ స్టార్ హీరోయిన్ కంగనా ర‌నౌత్ టైటిల్ పాత్రలో న‌టించిన భారీ బ‌డ్జెట్ మూవీ ‘చంద్రముఖి 2’. లైకా ప్రొడక్షన్స్ బ్యాన‌ర్‌పై సుభాస్కర‌న్ నిర్మించిన ఈ సినిమాని డైరెక్టర్ పి.వాసు తెర‌కెక్కించారు. వినాయ‌క చ‌వితి సంద‌ర్భంగా తెలుగు, త‌మిళ భాష‌ల్లో సెప్టెంబ‌ర్ 15న ఈ సినిమా విడుద‌ల‌వుతుంది.
తాజాగా ఈ సినిమా ట్రైలర్ విడుదలైంది. ట్రైల‌ర్‌లో రాఘవ లారెన్స్ రెండు షేడ్స్‌లో కనిపించారు. ఒక‌టి స్టైలిష్ లుక్ కాగా.. మ‌రొకటి వేట్టయ రాజా లుక్. ఇక చంద్రముఖి పాత్రలో కంగనా ర‌నౌత్ ఒదిగిపోయారు. మరోవైపు బ‌స‌వ‌య్యగా పాత్రలో స్టార్ క‌మెడియ‌న్ వ‌డివేలు నటించారు. ‘చంద్రముఖి’ సినిమాలో కూడా ఆయన బసవయ్య పాత్రలో నటించాడు.. మళ్లీ ఈ సినిమాలో అదే పాత్రలో కనిపించబోతున్నారు. సీనియర్ నటి రాధిక కీలక పాత్ర పోషించారు. చంద్రముఖి సినిమాలోని ఆ ప్యాలెస్‌లోనే ఇప్పుడు ఈ సినిమాలో కూడా కొనసాగబోతోంది. 17 ఏళ్ల తరవాత మళ్లీ రిపీట్ అంటూ వడివేలుతో డైలాగ్ కూడా చెప్పించారు.
అయితే, వేట్టయ రాజా పాత్రలో లారెన్స్‌ను చూసిన కొంత మంది సినీ ప్రేమికులు.. రజనీకాంత్‌ను గుర్తుచేసుకుంటున్నారు. రజనీని ఎవ్వరూ రీప్లేస్ చేయలేరంటూ యూట్యూబ్‌లో కామెంట్లు పెడుతున్నారు. రజనీ స్వాగ్‌ను మరిపించడం ఎవరితరం కాదని అభిప్రాయపడుతున్నారు. మరోవైపు, రాఘవ లారెన్స్ కూడా చాలా బాగున్నారని కొంతమంది కామెంట్లు పెడుతున్నారు. ఆయనకు ఈ సినిమా మంచి విజయాన్ని అందిస్తుందని ఆశిస్తున్నారు. ఇంకా.. డబ్బింగ్‌ ఫ్లేవర్‌ ఎక్కువగా కనిపించింది. చూడాలి మరి ఈసినిమా ప్రేక్షకులను ఎంతవరకూ ఆకట్టుకుంటుందో.
ఈ సినిమాకి ఎం.ఎం.కీర‌వాణి సంగీతం అందిస్తున్నారు. ఆర్‌.డి.రాజ‌శేఖ‌ర్ సినిమాటోగ్రఫీ హైలైట్‌గా ఉంటుందని చిత్ర యూనిట్ చెబుతోంది. కాగా, ఈ సినిమాలో ల‌క్ష్మీ మీన‌న్‌, మ‌హిమా నంబియార్‌, విఘ్నేష్‌, ర‌విమారియ, శృష్టి డాంగే, శుభిక్ష, వై.జి.మ‌హేంద్రన్, రావు ర‌మేష్‌, సాయి అయ్యప్పన్,సురేష్ మీన‌న్‌, శత్రు, టి.ఎం.కార్తీక్‌ తదితరులు నటించారు.
