ముఖ్యమంత్రి చంద్రబాబు నాయుడు అధ్యక్షతన గురువారం జరిగిన ఏపీ కేబినెట్ సమావేశం జరిగింది. ఎన్నికలు సమీపిస్తున్నందున పలు కీలక నిర్ణయాలు తీసుకున్నారు. సుమారు 4 గంటలకు పైగా సాగిన ఈ సమావేశంలో పలు అంశాలపై చర్చించారు. కాపులకు 5 శాతం రిజర్వేషన్లు కల్పించే ప్రతిపాదనకు కేబినెట్ ఆమోదం తెలిపింది. ఈ సమావేశాల్లోనే బిల్లును ప్రవేశపెట్టడానికి నిర్ణయం తీసుకుంది. అగ్రవర్ణాలకు అమల్లోకి వచ్చిన 10 శాతం రిజర్వేషన్ల నుంచే వీటిని కేటాయించే యోచన. వంశధార నిర్వాసితులపై పెట్టిన కేసుల ఎత్తివేతకు మంత్రివర్గం ఆమోదం తెలిపింది. ప్రత్యేక హోదాపై కీలక చర్చ జరిగింది.
అగ్రిగోల్డ్‌ బాధితులకు పరిహారం చెల్లింపుపై కీలక నిర్ణయం తీసుకుంది. హైకోర్టులో రూ.250 కోట్లు డిపాజిట్‌ చేసి అగ్రిగోల్డ్‌ బాధితులకు చెల్లించాలని, ఆస్తుల వేలం తర్వాత ఆ మొత్తాన్ని వెనక్కి తీసుకోవాలని నిర్ణయం. సెలూన్లకు 150 యూనిట్ల వరకు ఉచిత విద్యుత్, సమైక్యాంధ్ర ఉద్యమం నాటి మిగిలిన కేసులు ఎత్తివేయాలని నిర్ణయం.
పసుపు – కుంకుమ పథకం నిధుల పంపిణీకి, చుక్కల భూముల సమస్యల పరిష్కారంపై ముసాయిదా బిల్లుకు మంత్రివర్గం ఆమోదం.
“భూధార్‌” ప్రాజెక్టుకు చట్టబద్ధత కల్పించేందుకు ఉద్దేశించిన ముసాయిదా బిల్లుకు కేబినెట్ ఆమోదం. ప్రస్తుత అసెంబ్లీ సమావేశాల్లోనే దీనికి సంబంధించిన సవరణ బిల్లును ప్రవేశపెట్టడానికి నిర్ణయించింది. రాజధాని ఆర్థిక ప్రణాళికకు కేబినెట్ ఆమోదం. బేడ, బుడగ జంగాలను ఎస్సీల్లో చేర్చాలన్న శర్మ కమిషన్ నివేదికకు మంత్రివర్గం ఆమోదం.
వంశధార నిర్వాసితులపై పెట్టిన కేసుల ఎత్తివేతకు మంత్రివర్గం ఆమోదం. జయహో బీసీ సదస్సులో ఇచ్చిన హామీలపైనా మంత్రివర్గ సమావేశంలో చర్చ జరిగింది. హామీలకు సంబంధించి వెంటనే జీవోలు ఇవ్వాలని సీఎం చంద్రబాబు ఆదేశాలు జారీ చేశారు. వివిధ ఫెడరేషన్లను కార్పొరేషన్లుగా చేయడంపైనా చర్చించారు. అన్ని కులాలకు కార్పొరేషన్లు ఏర్పాటు చేస్తామని సీఎం చంద్రబాబు ఇటీవల హామీ ఇచ్చిన విషయం తెలిసిందే.
ఫిబ్రవరి 8న మరోసారి మంత్రివర్గ భేటీ నిర్వహించాలని నిర్ణయం తీసుకున్నారు. ఎన్నికల నేపథ్యంలో ఆ రోజు మరిన్ని తాయిలాలు, ప్రత్యేక పథకాలు ప్రకటించే అవకాశం ఉంది. లోక్ సభ సాధారణ ఎన్నికలు సహా ఏపీ అసెంబ్లీ ఎన్నికలకు ఫిబ్రవరి 10న నోటిఫికేషన్ విడుదలయ్యే అవకాశం ఉంది. నోటిఫికేషన్ వస్తే.. ఎన్నికల కోడ్ అమల్లోకి వస్తుంది. ఆ తర్వాత కొత్త పథకాలు ప్రకటించడానికి వీలుండదు.
