బాలీవుడ్‌ యువ నటుడు సుశాంత్ సింగ్‌ రాజ్‌పూత్‌ బలవన్మరణానికి అతని ప్రియురాలు రియా చక్రవర్తి కారణమని పేర్కొంటూ ఓ వ్యక్తి బిహార్‌లోని ముజఫర్‌పూర్‌ కోర్టులో పిటిషన్‌ దాఖలు చేశాడు. సుశాంత్ ఈ నెల 14న తన నివాసంలో ఉరివేసుకుని ఆత్మహత్యకు పాల్పడిన విషయం తెలిసిందే. దీంతో ముజఫర్‌పూర్‌లోని పతాహీ ప్రాంతానికి చెందిన కుందన్‌ కుమార్‌.. బాలీవుడ్‌లోని నెపోటిజమ్‌ కారణంగానే సుశాంత్ ఆత్మహత్య చేసుకున్నారని పేర్కొంటూ స్థానిక కోర్టులో ఇటీవల ఓ పిటిషన్‌ దాఖలు చేశాడు.
కాగా, తాజాగా ఆయన రియాచక్రవర్తిపై ఆరోపణలు చేస్తూ కోర్టులో కొత్తగా మరో పిటిషన్‌ వేశాడు. సుశాంత్ మానసిక ఒత్తిడికి రియా ఓ కారణమని, అంతేకాకుండా సుశాంత్ దగ్గర నుంచి ఆమె అధిక మొత్తంలో డబ్బు దోపిడీ చేసిందని సదరు పిటిషన్‌లో పేర్కొన్నాడు. కుందన్‌ పిటిషన్‌పై జూన్‌ 24న కోర్టులో విచారణ జరగనుంది. ఈ విషయంపై కుందన్‌ న్యాయవాది మాట్లాడుతూ.. ‘నా క్లయింట్‌ కుందన్‌ .. సుశాంత్ సింగ్‌ రాజ్‌పూత్‌కు వీరాభిమాని. ఐపీసీ 306, 420 సెక్షన్స్ కింద అతను పిటిషన్‌ దాఖలు చేశాడు’ అని న్యాయవాది పేర్కొన్నాడు.
