Bharateeyudu 2 promotions:
స్టార్ డైరెక్టర్ శంకర్ తమిళ్ లో మాత్రమే కాక తెలుగు ప్రేక్షకులకు కూడా సుపరిచితులే. రోబో, 2.0, ఇలాంటి భారీ బడ్జెట్ సినిమాలతో తెలుగు ప్రేక్షకులను కూడా ఆకట్టుకున్న శంకర్ కమల్ హాసన్ హీరోగా 1996 భారతీయుడు సినిమాకి సీక్వెల్ గా భారతీయుడు 2 సినిమాని తెరకెక్కించారు. అయితే ఈ సినిమా షూటింగ్ తో పాటే శంకర్ రామ్ చరణ్ గేమ్ చేంజర్ సినిమా షూటింగ్ కూడా పూర్తి చేశారు.
అయితే గత కొంతకాలంగా భారతీయుడు 2 సినిమా గురించి బోలెడన్ని అప్డేట్లు ఇస్తున్న శంకర్ గేమ్ చేంజర్ విషయంలో మాత్రం మౌనంగానే ఉంటున్నారు. ఈ నేపథ్యంలో అసలు ఈ సినిమా సంగతేంటి అంటూ రామ్ చరణ్ అభిమానులు శంకర్ ను తీవ్ర స్థాయిలో ట్రోల్ చేస్తున్నారు.
దీనికి తగ్గట్టుగానే శంకర్ కూడా ప్రవర్తిస్తున్నారు. భారతీయుడు 2 సినిమా ప్రమోషన్స్ సమయంలో కావాలనే గేమ్ చేంజర్ సినిమాకి సంబంధించిన ప్రశ్నలను అవాయిడ్ చేస్తున్నట్లు అనిపిస్తోంది. డైరెక్ట్ గా అడిగితే తప్ప శంకర్ సినిమా గురించి నోరు విప్పడం లేదు. పోనీ ఎంత సినిమా గురించి అడిగినా కూడా ఏదో ఒకటి రెండు లైన్స్ లో జవాబు ఇచ్చేసి ఆపేస్తున్నారు.
తాజాగా సినిమా ప్రమోషన్స్ లో మాట్లాడుతూ గేమ్ చేంజర్ షూటింగ్ గురించి అడిగితే ఇంకొన్ని రోజుల్లో అయిపోతుంది అని జవాబు ఇచ్చారు. రామ్ చరణ్ తో పని చేయడం ఎలా ఉంది అంటే అదొక డిఫరెంట్ ఎక్స్పీరియన్స్ అంతే అని సింపుల్ గా తేల్చి చెప్పేశారు.
దీంతో రామ్ చరణ్ అభిమానులు చాలానే హర్ట్ అయ్యారని చెప్పుకోవాలి. శంకర్ విషయంలో కోపం తెచ్చుకున్న రామ్ చరణ్ అభిమానులు ఇప్పుడు భారతీయుడు 2 సినిమా చూడడానికి కూడా ఆసక్తి చూపించడం లేదు. గేమ్ చేంజర్ గురించి సరిగ్గా అప్డేట్ కూడా ఇవ్వకుండా భారతీయుడు 2 సినిమా చూసేదే లేదని కామెంట్లు చేస్తున్నారు.
అసలే భారతీయుడు 2 మీద తెలుగు రాష్ట్రాల్లో అంచనాలు తక్కువగా ఉన్నాయి. ఇలాంటి సమయంలో శంకర్ ఇలా ప్రవర్తిస్తే మెగా అభిమానులు రివర్స్ అయ్యే అవకాశాలు ఉన్నాయి. అదే జరిగితే భారతీయుడు 2 సినిమా డిజాస్టర్ అయ్యే అవకాశాలు ఎక్కువగా ఉన్నాయి. దీంతో శంకర్ వల్లే సినిమా ఫ్లాప్ అయ్యేలా ఉంది అంటూ మరికొందరు కామెంట్లు చేస్తున్నారు.
