రాక్షసుడు సినిమాతో విజయాన్ని అందుకున్న బెల్లంకొండ శ్రీను ఇప్పుడు దానికి సీక్వెల్ చేసే ఆలోచనలో ఉన్నాడట. దర్శకుడు రమేష్ వర్మ స్క్రిప్ట్‌ను సిద్ధం చేసే పనిలో ఉన్నాడట. రాక్షసుడు నిర్మాత కోనేరు సత్యనారాయణ ఈ చిత్రాన్ని నిర్మించబోతున్నారు. పరిస్థితులు అనుకూలిస్తే వచ్చే ఏడాది జనవరిలోనే ఈ సినిమా షూటింగ్ ప్రారంభించాలని చూస్తున్నారు. ఆరేళ్ల క్రితం అల్లుడు శీను సినిమాతో తెరంగేట్రం చేసిన బెల్లంకొండ శ్రీనివాస్ తనకు ఓ గుర్తింపును తెచ్చుకున్నాడు. మొదటి సినిమా విజయం సాధించినప్పటికీ కలెక్షన్ల పరంగా మాత్రం కాస్త నిరాశపడ్డాడు. జయజానకీనాయక మినహా ఆ తరువాత వచ్చిన సినిమాలు కూడా అంతగా ప్రేక్షకులను ఆకట్టుకోలేకపోయాయి. ప్రస్తుతం సంతోష్ శ్రీనివాస్ ద‌ర్శ‌క‌త్వంలో తెర‌కెక్కుతోన్న ‘అల్లుడు అదుర్స్’ చిత్రంలో బెల్లంకొండ శ్రీను న‌టిస్తున్న సంగతి తెలిసిందే. ఇప్పటికే చాలావరకు షూటింగ్ పూర్తిచేసుకున్న ఈ సినిమా లాక్‌డౌన్ కారణంగా వాయిదా పడిన సంగతి తెలిసిందే.
