టాలీవుడ్‌ ప్ర‌ముఖ న‌టుడు నంద‌మూరి బాలకృష్ణ కరోనా నేపథ్యంలో తన పుట్టిన రోజున అభిమానుల్ని రావొద్ద‌ని కోరారు. జూన్ 10న బాలకృష్ణ పుట్టిన రోజు. ఈ వేడుక‌ని జ‌రిపేందుకు ప్ర‌తి ఏడాది అభిమానులు బాలకృష్ణ ఇంటికి త‌ర‌లి వచ్చేవారు. కొవిడ్ సెకండ్ వేవ్ తీవ్ర‌త దృష్ట్యా ఈసారి అలాంటి కార్య‌క్ర‌మాలు వ‌ద్ద‌ని, అందరూ త‌మ త‌మ కుటుంబ స‌భ్యుల‌తోనే గ‌డ‌పాల‌న్నారాయ‌న. ఈ సందర్భంగా బహిరంగ లేఖ ద్వారా విజ్ఞప్తి తెలియజేసారు.
‘‘నా ప్రాణ సమానులైన అభిమానులకు విజ్ఞప్తి. జూన్ 10న నా పుట్టినరోజు సందర్భంగా ప్ర‌తి సంవ‌త్సరం నన్ను కలిసేందుకు నలుదిక్కుల నుంచి తరలివస్తున్న మీ అభిమానానికి సర్వదా విధేయుడ్ని. కానీ, కరోనా విలయతాండవం చేస్తోన్న ఈ విపత్కర పరిస్థితుల్లో మీరు రావటం అభిలషణీయం కాదు. నన్నింతటివాడ్ని చేసింది మీ అభిమానమే. ఒక్క అభిమాని దూరమైనా నేను భరించలేను. మీ అభిమానాన్ని మించిన ఆశీస్సు లేదు.. మీ ఆరోగ్యాన్ని మించిన శుభాకాంక్ష లేదు. మీ కుటుంబంతో మీరు ఆనందంగా గడపటమే నా జన్మదిన వేడుక. దయచేసి ఎవ‌రూ రావ‌ద్ద‌ని తెలియ‌జేస్తున్నాను. ఈ విపత్కాలంలో అసువులు బాసిన నా అభిమానులకు, కార్యకర్తలకు, అభాగ్యులందరికీ నివాళులర్పిస్తున్నాను’’ అని పేర్కొన్నారు.
