నందమూరి బాలకృష్ణ నటించిన ‘భైరవద్వీపం’ సినిమా గురించి ప్రత్యేకించి చెప్పనవసరం లేదు. ఈ సినిమా అప్పట్లో సూపర్ హిట్‌గా నిలిచింది. దిగ్గజ దర్శకుడు సింగీతం శ్రీనివాసరావు.. ఈ సినిమాకి దర్శకత్వం వహించారు. ఈ సినిమా విడుదలై ఇప్పటికి దాదాపు 30 ఏళ్లు పూర్తికావస్తుంది. ఇప్పుడు ఈ సినిమా రీరిలీజ్ చేస్తున్నారు.
క్లాప్స్ ఇన్ఫోటైన్మెంట్ బ్యానర్‌పై చంద్రశేఖర్ కుమారస్వామి, పి. దేవ్ వర్మ ‘భైరవద్వీపం’ సినిమాను 4K క్వాలిటీలోకి అప్‌గ్రేడ్ చేసి ఆగస్టు 5న మళ్లీ విడుదల చేస్తున్నారు. ఈ సినిమాలో రోజా హీరోయిన్‌గా నటించిన విషయం తెలిసిందే. దివంగత నటుడు, రచయిత రావి కొండలరావు ఈ సినిమాకు కథ అందించగా.. సింగీతం శ్రీనివాసరావు స్క్రీన్‌ప్లే రాసి దర్శకత్వం వహించారు. చందమామ విజయా కంబైన్స్ బ్యానర్‌పై బి.వెంకట్రామిరెడ్డి నిర్మించారు. కైకాల సత్యనారాయణ, సంగీత, విజయకుమార్, కె.ఆర్.విజయ, రంభ, శుభలేఖ సుధాకర్, గిరిబాబు, బాబూ మోహన్ వంటి ప్రముఖ నటీనటులు ఈ సినిమాలో నటించారు.
ఈ చిత్రం ద్వారా విజయ రంగరాజు విలన్‌గా తెలుగు చిత్రసీమకు పరిచయమయ్యారు. మాదవపెద్ది సురేష్ సంగీతం సమకూర్చారు. అప్పట్లో ఈ సినిమాలో పాటలు సూపర్ హిట్. అలాగే సినిమా కూడా బ్లాక్ బస్టర్ అయ్యింది. ఏకంగా 9 నంది అవార్డులు గెలుచుకుంది. ఈ సినిమాలో మాంత్రికుడు కనిపించినప్పుడల్లా నేపథ్య సంగీతంలో వచ్చే ‘కవచ కవచ’ అనే సౌండ్ అప్పట్లో ఒక ట్రెండ్ సెట్ చేసిందట. ఇప్పుడు అదే సౌండ్‌ను మరోసారి థియేటర్లలో డాల్బీ టెక్నాలజీతో వినొచ్చు.
